Sahibkarlıq

Ana səhifə

Sahibkarlıq

Azərbaycanda «Məişət Malları» ASC-nin səhmlərinin özəlləşdirilməsi ilə bağlı investisiya müsabiqəsi elan edilib

08 fevral 2010 12:51 (UTC +04:00)

Bakı. Rəşad Süleymanov - APA-Economics. Azərbaycanda «Məişət Malları» ASC-nin səhmlərinin özəlləşdirilməsi ilə bağlı investisiya müsabiqəsi elan edilib. Bu barədə «APA-Economics»ə Əmlak Məsələləri üzrə Dövlət Komitəsindən məlumat verilib.

Şərtlərə əsasən, investisiya müsabiqəsində yerli investorlarla yanaşı, xarici sərmayəçilər də iştirak edə bilərlər. Müsabiqəyə yekun vurularkən müəyyən edilmiş şərtlər daxilində maksimum həcmdə investisiya təklif etmiş və onun səmərəli qoyuluşu üzrə öhdəlik götürmüş iddiaçıya üstünlük veriləcək.

Səhmdar cəmiyyətinin əsas fəaliyyətini plastik kütlədən hazırlanmış məmulatlar, ətriyyat məhsulları, habelə kağız məmulatları və divar kağızlarının istehsalı və satışı təşkil edir. Bakı şəhərində yerləşən müəssisə 1930-cu ildə istismara verilib, 1990-cı ildə istehsal prosesinin genişləndirilməsi məqsədilə əlavə olaraq yeni istehsal sahələri və inzibati binaları tikilib.

Müsabiqədə iştirak etmək üçün investorlar beynəlxalq və müasir tələblər səviyyəsində polietilen və polipropilen məhsulların istehsalı və emalına dair bir sıra şərtləri özündə cəmləşdirən, investisiya qoyuluşlarının istiqamətləri, məbləği və müddətləri göstərilməklə İnvestisiya Proqramını təqdim etməlidirlər. İnvestisiya Proqramında səhmdar cəmiyyətinin səhmlərinin alqı-satqı müqaviləsi imzalandığı tarixdən 60 gün müddətində təklif olunmuş investisiya həcminin ümumi məbləğinin müəyyən hissəsinin 5%-ə qədərinin pul vəsaiti şəklində səhmdar cəmiyyətinin hesablaşma hesabına köçürülməsi və ondan istifadəyə dair təkliflər də öz əksini tapmalıdır.

İnvestorlar həmçinin dövlət büdcəsinə ödəniləcək 150 min manat vəsaitdən az olmamaq şərti ilə müvafiq təkliflər verməlidirlər.

Müsabiqədə iştirak etmək üçün ərizə və təkliflərin qəbulu martın 5-dək, müsabiqə komissiyası tərəfindən təkliflərin qiymətləndirilməsi isə martın 10-dan başlayaraq həyata keçiriləcək.