Sahibkarlıq

Ana səhifə

Sahibkarlıq

Sahibkarlığa Kömək Milli Fondu bu il Bərdədə ilk regional tədbirini keçirib

12 fevral 2010 12:58 (UTC +04:00)

Bakı. Nicat Mustafayev – APA-Economics. Bu gün Sahibkarlığa Kömək Milli Fondu (SKMF) 2010-cu ildə «Regionlarda sahibkarlığın inkişafına dövlət dəstəyi» mövzusunda ilk tədbirini Bərdədə keçirib. Tədbirdə Aran iqtisadi rayonunda fəaliyyət göstərən 350-dən çox sahibkar iştirak edib.

SKMF-dan «APA-Economics»ə verilən məlumata görə, tədbirdə İqtisadi İnkişaf Nazirliyinin Sahibkarlığın inkişafı siyasəti şöbəsinin müdiri Zaur Qasımov, Regionların inkişafı və dövlət proqramları şöbəsinin müdiri Sahib Məmmədov çıxış edərək Azərbaycanda sahibkarlığın daha da inkişaf etdirilməsi üçün əlverişli şəraitin olduğunu bildiriblər, regionların inkişafında dövlət proqramlarının rolu və regionların gələcək inkişaf perspektivləri haqqında tədbir iştirakçılarına məlumat veriblər.

Tədbirdə çıxış edən İqtisadi İnkişaf Nazirliyinin Bakı Biznes Tədris Mərkəzinin direktoru Akif Fərruxov 2010-cu ildə sahibkarların maarifləndirilməsi sahəsində görüləcək işlər və keçirilməsi nəzərdə tutulan tədbirlər barədə iştirakçıları məlumatlandırıb.

Daha sonra Sahibkarlığa Kömək Milli Fondunun icraçı direktoru Şirzad Abdullayev Fondun 2009-cu ildəki fəaliyyəti barədə tədbir iştirakçılarına məlumat verib və qeyd edib ki, 2009-cu ildə Fondun vəsaitləri hesabına müvəkkil kredit təşkilatları vasitəsilə respublikanın 55 şəhər və rayonu üzrə 2 101 sahibkarlıq subyektinin investisiya layihəsinin maliyyələşdirilməsinə 130 mln. manat güzəştli kreditlər verilib. Bu vəsaitin 74 mln. manatını büdcə vəsaiti, 56 mln. manatını isə Fondun xəzinə hesabına qaytarılmış kredit məbləğləri və kredit faizləri təşkil edib. Güzəştli kreditlər əsasən, sənaye məhsulları istehsalı, kənd təsərrüfatı məhsullarının istehsalı və emalı, aqrar sektorun inkişafına təkan verəcək infrastruktur layihələrinə (soyuducu və taxıl anbarları komplekslərinə), kəndli fermer təsərrüfatlarının inkişafı və s. üzrə layihələrin maliyyələşdirilməsinə yönəldilib. Güzəştli kreditlər hesabına maliyyələşdirilmiş investisiya layihələrinin həyata keçirilməsi nəticəsində 8 500-ə yaxın yeni iş yerinin yaradılması nəzərdə tutulur.

SKMF-in qəbuluna başladığı yeni investisiya layihələri barədə məlumat verən Ş.Abdullayev bildirib ki, investisiya təklifləri südlük cins iribuynuzlu heyvandarlıq komplekslərinin (ailə fermer təsərrüfatlarının), kiçik və ya orta həcmli üzüm emalı müəssisələrinin yaradılması, uşaq qidası istehsalının təşkil olunması layihələrini özündə əks etdirməlidir. Yaradılacaq kompleks və müəssisələr üçün seçiləcək ərazi əlverişli infrastruktura malik olmalı, müasir standartlara cavab verən avadanlıqlar quraşdırılmalı, laboratoriya yaradılmalıdır.

Tədbir çərçivəsində müvəkkil kredit təşkilatları vasitəsilə Bərdə, Ağcabədi, Goranboy, Beyləqan, İmişli, Saatlı və Biləsuvar rayonlarında fəaliyyət göstərən 42 sahibkarlıq subyektinə güzəştli kreditlər verilib. Bu kreditlər hesabına 100-dən çox yeni iş yerinin yaradılması nəzərdə tutulur.