Sahibkarlıq

Ana səhifə

Sahibkarlıq

Azərbaycan Sahibkarlar Konfederasiyası Rəyasət Heyətinin toplantısı keçirilib - FOTO

Azərbaycan Sahibkarlar Konfederasiyası Rəyasət Heyətinin toplantısı keçirilib - <font color=red>FOTO</font>

19 fevral 2010 14:14 (UTC +04:00)

Bakı. Rəşad Süleymanov – APA-Economics. Bu gün Bakıda Azərbaycan Sahibkarlar Konfederasiyası (ASK) Rəyasət Heyətinin növbəti iclası keçirilib. «APA-Economics»in məlumatına görə, iclasda Azərbaycan Nazirlər Kabineti, Azərbaycan Həmkarlar İttifaqları Konfederasiyası və ASK arasında bağlanmış 2010-2011-ci illər üçün Baş Kollektiv Sazişin icrası ilə əlaqədar ASK-nın tədbirlər planının təsdiq edilməsi, 2009-cu ilin yekunlarına dair hesabatı, 2010-cu il üçün fəaliyyət planının təsdiq olunması, maliyyə fəaliyyətinin auditinin aparılması üçün auditorun təyin edilməsi və üzvlüyə qəbul məsələləri müzakirə olunaraq qəbul edilib.

Daha sonra ASK və Azərbaycan Universiteti arasında mütəxəssislərin peşəkarlığının artırılması, kadr hazırlığı və təkmilləşdirilməsinə dair aparılan müzakirələr barədə məlumat verilib. Universitetin rektoru Akif Musayev bildirib ki, rəhbərlik etdiyi təhsil müəssisəsi iqtisadiyyatın tələb olunan sahələri üzrə kadrlar hazırlayır. Cari ilin iyun ayında ABŞ-ın Corciya Universitetindən dəvət olunan professorlar həm Azərbaycan Universitetində, həm də sahibkarlar üçün mühazirələr oxuyacaq, seminarlar keçəcək.

ASK-nın 2010-cu il üzrə fəaliyyət planı barədə məlumat verən Konfederasiyanın baş katibi Məhəmmədəli Əfəndiyev isə bildirib ki, cari ildə «Sosial partnyorluq haqqında» və «İşəgötürən birliklər haqqında» qanun layihələrinin hazırlanıb hökumətə təqdim olunması, həmçinin bir sıra ölkələrdə biznes-forumların təşkili, Azərbaycana böyük investisiya yatırmış ölkələrdə ASK-nın nümayəndəliklərinin açılması və s. planlaşdırılır.

ASK-nın prezidenti Məmməd Musayev isə qeyd edib ki, rəhbərlik etdiyi qurum bu il fəaliyyətini və digər qurumlarla əlaqələrini daha da genişləndirmək niyyətindədir. M.Musayev Vergi Məcəlləsinə əlavə və dəyişikliklərlə bağlı təkliflərin hazırlanması üçün sahibkarlara müraciət olunduğunu qeyd edib. M.Musayev hazırda ASK-nın regionlarda Vergilər Nazirliyi tərəfindən yaradılmış 15 vergi-kompüter terminalını idarə etdiyini, cari ildə isə daha 15 rayonda belə terminalların yaradılacağını vurğulayıb.

Qeyd edək ki, ASK 1999-cu ildə təsis edilib və hazırda 4 mindən artıq üzvü var. ASK ölkədə işəgötürənlərin mülkiyyət və təşkilati-hüquqi formasından asılı olmayaraq (dövlət büdcəsindən maliyyələşən təşkilatlar istisna olmaqla), sahibkarlıq fəaliyyəti ilə məşğul olan hüquqi və fiziki şəxslərin könüllülük əsasında fəaliyyətini əlaqələndirən, onların hüquqi və iqtisadi mənafelərini müdafiə edən, özünüidarəedən, ictimai-faydalı məqsədlər daşıyan, öz fəaliyyətinin əsas məqsədi kimi gəlir əldə etməyi nəzərdə tutmayan qeyri-kommersiya, qeyri-hökumət təşkilatıdır.