Sahibkarlıq

Ana səhifə

Sahibkarlıq

Azərbaycanın «Məişət malları» ASC-nin satılmamış səhmlərini «RAM Ltd.» şirkəti alıb

18 mart 2010 09:20 (UTC +04:00)

Bakı. Nicat Mustafayev – APA-Economics. Azərbaycan Əmlak Məsələləri Dövlət Komitəsi tərəfindən elan olunmuş «Məişət malları» ASC-nin səhmlərinin pul hərracında satılmamış 30,01% hissəsinin satışı üzrə investisiya müsabiqəsinin qalibi müəyyənləşib.

Komitədən «APA-Economics»ə verilən məlumata görə, ölkənin müxtəlif bölgələrində yerləşən qeyri-neft sektoruna aid müəssisələrin özəlləşdirmədən sonra inkişaf etdirilməsi məqsədilə «İnvestisiya müsabiqəsinin keçirilməsi Qaydaları»na müvafiq olaraq «Məişət malları» ASC-nin səhmlərinin pul hərracında satılmamış 30,01% hissəsinin satışı üzrə investisiya müsabiqəsi elan olunub ki, iddiaçılar qarşısında qoyulan maliyyə-iqtisadi şərtlərdən başlıcası müəssisəyə investisiya qoyuluşuna dair təkliflərin verilməsi olub.

Müsabiqədə iştirak etmək üçün bir neçə iddiaçı tərəfindən ərizə və investisiya təklifləri təqdim edilib. Azərbaycanın müvafiq nazirlik və təşkilatlarından nümayəndələrin daxil olduğu Müsabiqə Komissiyasının qərarına əsasən hər iki iddiaçı iştirakçı statusu əldə edib.

Komissiya müsabiqə iştirakçılarının təqdim etdikləri investisiya təkliflərinə baxdıqdan sonra açıq səsvermə yolu ilə qərar qəbul edib. Səsvermənin nəticələrinə uyğun olaraq, «RAM Ltd.» MMC «Məişət malları» ASC-nin səhmlərinin pul hərracında satılmamış 30,01% hissəsinin satışı üzrə investisiya müsabiqəsinin qalibi elan edilib.

Müsabiqənin şərtlərinə müvafiq olaraq, müsabiqə qalibi 150 min manat məbləğində pul vəsaitinin dövlət büdcəsinə köçürülməsini, həmçinin investisiya proqramına əsasən bir il ərzində 275,8 min manat məbləğində investisiya qoyuluşunun yerinə yetirilməsini öhdəsinə götürüb. Nəzərdə tutulan investisiyalar polipropilen və polietilen kompozisiya qranul məhsullarının istehsalını həyata keçirən qurğunun, suyun dövr etməsi ilə birbaşa soyudan qurğunun, habelə təkqatlı polietilen film (paket, örtük) istehsal edən ekstruderin alınıb quraşdırılmasına və müvafiq sexlərdə təmir işlərinin həyata keçirilməsinə yönəldiləcək. Nəticədə polimer kompozisiya qranulları, onlardan isə müxtəlifçeşidli sənaye məhsulları, o cümlədən paket, örtük və s. istehsal ediləcək.

Bununla yanaşı, təqdim edilmiş investisiya proqramına əsasən, investisiya fəaliyyəti ərzində işçilərin əmək haqlarının artırılması nəzərdə tutulub.