Sahibkarlıq

Ana səhifə

Sahibkarlıq

Azərbaycanda «Mülkiyyət müqəddəsdir» adlı ictimai komissiya yaradılıb

18 mart 2010 11:47 (UTC +04:00)

Bakı. Elnur Hüseynquluyev - APA-Economics. Azərbaycanda bir neçə qeyri-hökumət təşkilatının təşəbbüsü ilə «Mülkiyyət müqəddəsdir» adlı ictimai komissiya yaradılıb.

«APA-Economics»in məlumatına görə, bu gün bununla bağlı keçirilən tədbirdə komissiyanın üzvlərindən olan Sabit Bağırov bu komissiyanın məqsəd və prinsipləri, həmçinin hüquqi statusu və fəaliyyətinin idarə olunması prinsiplərindən söz açıb.

Bildirib ki, onları bu komissiyanı yaratmağa vadar edən səbəb son zamanlar ölkə vətəndaşlarının mülkiyyət hüquqlarının pozulması faktlarıdır: “İnsanlar tez-tez vəzifəli şəxslərin və oliqarxların qurbanlarına çevrilirlər. Vətəndaşların evləri sökülür, sahibkarlıq obyektləri dağıdılır və ya sahiblərinin əlindən alınır”.

S.Bağırovun sözlərinə görə, komissiyanı yaratmaqda əsas məqsəd mülkiyyət hüquqlarının müqəddəsliyi və toxunulmazlığı prinsiplərinin həyat normasına çevrilməsi, mülkiyyət hüquqlarının toplanması, təhlili və aşkarlanması, həmçinin mülkiyyət münasibətlərində dövlət, özəl sektorla vətəndaş cəmiyyəti institutları arasında qarşılıqlı əməkdaşlıq imkanlarının genişləndirilməsidir.

Tədbirin sonunda komissiyanın digər üzvləri Azərbaycanda mülkiyyət hüquqlarının pozulması faktlarına dair geniş müzakirə aparıblar.

Qeyd edək ki, komissiya hüquqi şəxs deyil və ona üç nəfərdən ibarət sədarət rəhbərlik edir. Sədarət altı aydan bir dəyişir. Üzvlər istənilən vaxt komissiyanı tərk edə bilərlər.