Sahibkarlıq

Ana səhifə

Sahibkarlıq

Sahibkarlığa Kömək Milli Fondu Şamaxıda «Regionlarda sahibkarlığın inkişafına dövlət dəstəyi» mövzusunda tədbir keçirib

18 mart 2010 12:13 (UTC +04:00)

Bakı. Nicat Mustafayev – APA-Economics. Bu gün Şamaxıda Azərbaycan İqstiadi İnkişaf Nazirliyinin Sahibkarlığa Kömək Milli Fondu (SKMF) «Regionlarda sahibkarlığın inkişafına dövlət dəstəyi» mövzusunda tədbir keçirib.

Nazirlikdən «APA-Economics»ə verilən məlumata görə, tədbirdə Dağlıq Şirvan iqtisadi rayonunda fəaliyyət göstərən 280-ə yaxın sahibkar iştirak edib.

İqtisadi İnkişaf Nazirliyi sahibkarlığın inkişafı siyasəti şöbəsinin müdir müavini Elçin İbrahimov və regionların inkişafı və dövlət proqramları şöbəsinin müdiri Sahib Məmmədov çıxış edərək, sahibkarlığın daha da inkişaf etdirilməsi üçün ölkədə əlverişli şəraitin yaradıldığını bildirib, regionların inkişafında dövlət proqramlarının uğurlu icrasının rolu barədə məlumat veriblər.

Nazirliyin Bakı Biznes Tədris Mərkəzinin direktoru Akif Fərruxov sahibkarların maarifləndirilməsi sahəsində görülən işlər və keçirilməsi nəzərdə tutulan tədbirlər barədə tədbir iştirakçılarını məlumatlandırıb.

SKMF-in icraçı direktoru Şirzad Abdullayev isə öz növbəsində 2010-cu ildə güzəştli kreditlərin yönəldiləcəyi prioritet sahələr barədə tədbir iştirakçılarına geniş məlumat verib və bildirib ki, Fond tərəfindən Azərbaycanda əhalinin ərzaq məhsulları ilə etibarlı təminatına dair Dövlət Proqramına (2008-2015-ci illər) uyğun olaraq, yanvar ayında uşaq qidası istehsalının təşkili, südlük istiqamətli heyvandarlıq komplekslərinin, həmçinin kiçik və orta həcmli üzüm emalı müəssisələrinin yaradılması üzrə investisiya layihələrinin güzəştli qaydada maliyyələşdirilməsi məqsədilə sahibkarlıq subyektlərindən təkliflərin qəbuluna başlanılıb.

Bundan başqa, tədbir çərçivəsində SKMF-in güzəştli kreditlərinin verilməsi mexanizmi ilə bağlı sahibkarlar üçün treninq keçirilib. Treninqdə sahibkarlara biznes ideyalarının formalaşdırılması, investisiya layihələrinin hazırlanması və Fonda təqdim edilməsi qaydaları, güzəştli kreditlərdən səmərəli istifadə üsulları barədə ətraflı məlumat verilib, sahibkarları maraqlandıran suallar cavablandırılıb.

Tədbir çərçivəsində həmçinin, müvəkkil kredit təşkilatları vasitəsilə Şamaxı və ətraf rayonlarda fəaliyyət göstərən 40 sahibkarlıq subyektinə güzəştli kreditlər verilib. Bu kreditlər hesabına 90-a yaxın yeni iş yerinin yaradılması nəzərdə tutulur.