Sahibkarlıq

Ana səhifə

Sahibkarlıq

Bakıda Rusiya-Azərbaycan Ticarət Palatasının iclası keçirilib

19 mart 2010 15:18 (UTC +04:00)

Bakı. Nicat Mustafayev – APA-Economics. Bu gün Bakıda Rusiya-Azərbaycan Ticarət Palatasının iclası keçirilib.

«APA-Economics»in məlumatına görə, tədbirdə çıxış edən Rusiyanın Azərbaycandakı Ticarət Nümayəndəliyin rəhbəri Yuri Şedrin iki ölkə arasında mövcud əlaqələrin hazırkı vəziyyətindən danışıb və qeyd edib ki, 2009-cu il bütün ölkələr üçün olduğu kimi Azərbaycanla Rusiya üçün də sınaq ili olub. Qlobal maliyyə böhranının nəticələrindən danışan Y.Şedrin bildirib ki, böhran Azərbaycanla Rusiya arasındakı ticarət dövriyyəsinə təsir göstərib: «Əgər 2008-ci ildə Rusiya statistikasına əsasən, iki ölkə arasında ticarət dövriyyəsi 2,4 mlrd. ABŞ dollarına çatmışdırsa, ötən il bu göstərici 25% azalıb».

Y.Şedrin onu da qeyd edib ki, böhran nəticəsində 2009-cu ildə Azərbaycanın Rusiya ilə ticarət dövriyyəsi 6% azalıb (Azərbaycan Dövlət Statistika Komitəsinin məlumatlarına istinadən): «MDB ölkələri ilə Azərbaycan arasında ticarət dövriyyəsi 50% azalıb».

Bundan başqa, Y.Şedrin Rusiyadan Azərbaycana gətirilən malların azalması səbəbini də açıqlayıb. O, bildirib ki, buna əsasən Rusiyadan Azərbaycana gətirilən maşın və texnika avadanlıqlarının azalması səbəb olub ki, bu göstərici 2008-ci illə müqayisədə ötən il 31% azalıb: «Ötən il Rusiyadan Azərbaycana gətrilən avtobusların həcmi 78,4%, yük maşınlarının həcmi 50%, özüboşaldan avtomobillərin həcmi 85,5%, yanacaq-enerji məhsulları isə 46,3% azalıb».

Nümayəndəliyin rəsmisi bildirib ki, bütün bunlara baxmayaraq Rusiya Azərbaycanın əsas ticaərət partnyorları sırasındadır və 2010-cu ildə 2 mlrd. dollarlıq ticarət dövriyyəsinin bərpa olunmasına səy göstərəcək.

Ötən il Bakı-Novorossiysk neft boru kəməri ilə 2,5 mln. ton xam neftin göndərildiyini bildirən Y.Şedrin qeyd edib ki, 2008-ci illə müqayisədə bu göstərici 1,8 dəfə artıb: «Ümumiyyətlə, 2009-cu ildə iki ölkə arasında 1 541 adda mal mübadiləsi həyata keçrilib».

Tədbirdə həmçinin, gələcək plan və perspektivlər, iki ölkənin iş adamları arasında görüşlərin keçirilməsi planları müzakirə olunub.

Qeyd edək ki, hazırda Azərbaycanda 500-ə yaxın Rusiya şirkəti fəaliyyət göstərir.