Sahibkarlıq

Ana səhifə

Sahibkarlıq

Azərbaycanda ticarət və iaşə obyektlərinin əhaliyə satdığı malların həcmi yanvar-fevral aylarında 8% artıb

22 mart 2010 07:44 (UTC +04:00)

Bakı. Nicat Mustafayev – APA-Economics. Bu ilin yanvar-fevral aylarında Azərbaycanda pərakəndə ticarət və iaşə müəssisələrində əhaliyə 1 991,6 mln. manatlıq və ya 2009-cu ilin eyni dövründəkindən 8,1% çox istehlak malları satılıb və iaşə xidmətləri göstərilib.

Dövlət Statistika Komitəsindən «APA-Economics»ə verilən məlumata görə, artımın 99,5%-i özəl müəssisələrin fəaliyyəti sayəsində təmin edilib. Özəl sektorun müəssisələri üzrə pərakəndə ticarət və iaşə dövriyyəsinin həcmi 8,1% artaraq 1 976,5 mln. manat olub.

Pərakəndə və iaşə dövriyyəsinin ümumi həcmində qeyri-dövlət müəssisələrinin xüsusi çəkisi 99,2% olub.

Bununla yanaşı, 2010-cu ilin yanvar-fevral aylarında pərakəndə əmtəə dövriyyəsinin ümumi həcminin 2,6%-ni iaşə müəssisələrinin dövriyyəsi təşkil edib. İki ay ərzində əhaliyə 52,1 mln. manatlıq və ya 2009-cu ilin eyni dövründəkindən 16,3% çox iaşə xidmətləri göstərilib. Özəl iaşə müəssisələri üzrə dövriyyənin real həcmi 18,6% artaraq 50,3 mln. manat olub.

İaşə müəssisələri istisna olmaqla, pərakəndə ticarət şəbəkəsindən əhaliyə 1 939,5 mln. manatlıq və ya 7,9% çox əmtəə satılıb.

Pərakəndə əmtəə dövriyyəsinin real artımının 95,1%-i pərakəndə ticarət müəssisələrinin, 4,9%-i iaşə müəssisələrinin fəaliyyəti sayəsində təmin edilib.

Hesabat dövründə pərakəndə əmtəə dövriyyəsi üzrə ən yüksək artım sürəti hüquqi şəxs yaratmadan sahibkarlıq fəaliyyəti göstərən fərdi sahibkarların ticarət və iaşə müəssisələrində müşahidə olunub, onlara məxsus 1 363,6 min kv. metr ticarət sahəsi olan 43,8 min mağaza, 3,6 min köşk üzrə pərakəndə əmtəə dövriyyəsinin həcmi 14,3%, 147,6 min oturacaq yeri olan 5,2 min iaşə müəssisəsi üzrə dövriyyə 38,2% artıb.

Pərakəndə əmtəə dövriyyəsinin real artımının 84,8%-i hüquqi şəxs statuslu və hüquqi şəxs yaratmadan sahibkarlıq fəaliyyəti göstərən fərdi sahibkarların ticarət müəssisələrinin, 15,2%-i isə yarmarka və bazarların ticarət fəaliyyəti sayəsində yaranıb.

Bundan başqa, 2010-cu ilin yanvar-fevral aylarında ticarət şəbəkəsindən hər bir ölkə sakini hər ay orta hesabla 112 manatlıq və ya 2009-cu ilin eyni dövrü ilə müqayisədə 8,3 manat çox müxtəlif istehlak malları alıb. Artım ticarət müəssisələrində 7,1 manat, bazar və yarmarkalarda 1,2 manat təşkil edib.

Qeyd edək ki, hesabat dövründə əhaliyə satılmış ərzaq mallarının həcmi 8,4% artaraq 1 301,2 mln. manat, qeyri-ərzaq mallarının həcmi isə 7,9% artaraq 690,4 mln. manat olub. Hər ay orta hesabla adambaşına satılmış ərzaq mallarının həcmi 73,2 manata, qeyri-ərzaq mallarının həcmi 38,8 manata çataraq, əvvəlki ilin eyni dövrünün göstəricisini müvafiq olaraq 5,4 manat və 2,9 manat üstələyib.