Sahibkarlıq

Ana səhifə

Sahibkarlıq

Bakıda Rusiya brendi ilə saxta kolbasa istehsal edən şirkət aşkarlanıb

01 aprel 2010 13:36 (UTC +04:00)

Bu barədə «APA-Economics»ə İqtisadi İnkişaf Nazirliyinin mətbuat xidmətindən məlumat verilib.

Bakı şəhəri, Sabunçu rayonu, E.Mehdiyev küçəsi, 2 ünvanında yerləşən “Abşeron-2000” fərdi firmasında keçirilən yoxlamalar zamanı anbarda olan 1850 kq müxtəlif çeşidli hazır kolbasa məhsullarının üzərində istehsal tarixinin göstərilmədiyi, mallar satışa buraxılarkən onun üzərinə saxta istehsal tarixinin yazıldığı, ticarət şəbəkəsində müxtəlif səbəblərdən yarasız hala düşdüyü üçün geri qaytarılmış 570 kq-dan çox kolbasa məmulatlarının və aşkar keyfiyyətsizlik əlamətləri olan 530 kq ət və toyuq farşının xammal kimi istifadə olunduğu müəyyənləşdirilib. Bundan başqa, müəssisənin anbarında Rusiyanın “Tsaritsino” və “Çerkizovskiy” müəssisələrinin əmtəə nişanı ilə markalanan və həmin müəssisələrə məxsus texniki şərtlərin işarəsi göstərilən, kolbasa qablaşdırılmasında istifadə olunan qılaflar aşkar edilib. Bu da müəssisə tərəfindən istehsal edilən məhsulların bir hissəsinin saxtalaşdırılaraq Rusiya müəssisələrinin adı ilə satışa çıxarıldığını göstərir.

Eyni zamanda müəssisənin anbarında üzərində məhsulun saxlama müddəti normativ-texniki sənədlərlə müəyyən edilmiş müddətlərdən artıq göstərilmiş 27 750 metr kolbasa qılafı aşkar olunub.

İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti “Abşeron-2000” fərdi firmasının istehsal etdiyi və insan sağlamlığı üçün təhlükə törədə biləcək kolbasa məmulatlarını almamağı tövsiyə edir.