Sahibkarlıq

Ana səhifə

Sahibkarlıq

«McDonalds Azerbaijan» və «Xidmət-İş» Həmkarlar İttifaqları Federasiyası arasında qarşıdurma yaranıb

07 aprel 2010 10:08 (UTC +04:00)

Bunu «APA-Economics»ə açıqlamasında «Xidmət-İş» Həmkarlar İttifaqları Federasiyasının vitse-prezidenti Camaləddin İsmayılov bildirib.

C.İsmayılov bildirib ki, məlum olmayan səbəblərə görə, bu ilin mart ayının 15-də işəgötürən, şirkətin içracı direktoru M.Mirzəyev müəssisənin ilk həmkarlar təşkilatının sədri Arif Babayevi yanına dəvət edərək, həmkarlar təşkilatı və şəxsən onun adına lazımsız və yersiz ittihamlar irəli sürüb. «Səhəri gün M.Mirzəyev «McDonalds Azerbaijan» MMC-nin bütün obyektlərinə həmkarların üzvlərini dəvət etmək və işçilərdən üzvlükdən cıxmaq ərizəsinə qol çəkməyə məcbur edilməsi göstərişi verib. Bütün bu işləri isə şirkətin kadrlar şöbəsinin müdiri Tofiq Məmmədbəyov həyata keçirib».

C.İsmayılovun sözlərinə görə, son 20-30 il ərzində konfederasiyanın fəaliyyətində ilk dəfədir ki belə hala rast gəlinir. «Azərbaycan tarixində işəgötürən tərəfindən həmkarlar ittifaqlarına qarşı belə qanunsuz hərəkətlər olmayıb. Təsəvvür edin ki, kollektivdə həmkarların üzvü olduğuna görə işəgötürən işçiyə mənəvi və psixoloji təsir edərək onların mənliyini kollektiv qarşısında alçaldır. Azərbaycan BƏT-in 87 və 98 saylı beynalxalq konvensiyalarını ratifikasiya etdikdən sonra, işçilərin sərbəst birləşməsi və işəgötürənin həmkarların işinə müdaxilə etməməsinin qarantı olub. M.Mirzəyev isə bu zaminliyi kobud şəkildə pozur, dünyada Azərbaycanın imicini alçaldır».

C.İsmayılov bildirib ki, «McDonalds» şirkətinin baş ofisinə (ABŞ) və BƏT-ə göndərilən rəsmi məktublarda bu cür halların aradan qaldırılması ilə bağlı müvafiq tədbirlərin görülməsinin vacibliyi qeyd olunub.

«McDonalds Azerbaijan» MMC-nin icraçı direktoru M.Mirzeyev isə öz növbəsində «APA-Economics»ə açıqlamasında bütün bu ittihmalardan xəbərsiz olduğunu bildirib: «Belə bir şey bir müddət əvvəl olub. Bizdə çalışan ilk həmkarlar təşkilatının sədri Arif Babayev işçilərin xəbəri olmadan onları həmkarlar təşkilatına üzv qəbul edib və həmkarlar təşkilatına üzvlük haqqı kimi işçilərin əmək haqqından 1% yığıb. İşçilərin mənə yazdığı məktublarda bu faktlar təsdiq olunub».

M.Mirzəyevin sözlərinə görə, «McDonalds Azerbaijan» MMC Azərbaycanda ən aparıcı işəgötürən şirkətlərdən biridir. «Şirkətdə qarşılıqlı anlaşma və əməkdaşlığa əsaslandırılan kadr siyasəti həyata keçirilir. Biz işçilərimizin istənilən təşkilata üzv olması niyyəti və hüququna hörmətlə yanaşırıq. Şirkətin prioritetlərindən biri işçilərimizin hüquqlarının təmin edilməsi və onlara bacarıqlarını realllaşdırmağa şərait yaradılması, həmçinin müxtəlif konpensasiya və güzəştlər proqramı təqdim edilməsidir», - deyə M.Mirzəyev qeyd edib.

Qeyd edək ki, «Xidmət-İş» Həmkarlar İttifaqları Federasiyasının yaydığı məlumatda bildirilir ki, 2009-cu ildə Federasiya «McDonalds Azerbaijan» MMC-də könüllü olaraq işçilərin təşəbbüsü ilə ilk həmkarlar ittifaqı təşkilatı yaradıb. «Bu günə həmkarların üzvlərin sayı 160 nəfərdir. İşəgötürənlə münasibətlər yaxşı olub, həttə ötən ilin sonunda işəgötürənlə razılaşdırmaq üçün kollektiv müqavilənin lahiyəsi də təqdim edilib. Ancaq, məlum olmayan səbəblərə görə, bu ilin mart ayının 15-dən işəgötürən, içracı direktor M.Mirzəyev ilk həmkarlar təşkilatının sədri Arif Babayevi yanına dəvət edərək, həmkarlar təşkilatı və şəxsən onun adına lazımsız və yersiz ittihamlar irəli sürüb.