Sahibkarlıq

Ana səhifə

Sahibkarlıq

Mayın 19-21-də Bakıda XVI Azərbaycan Beynəlxalq Qida Sənayesi Sərgisi keçiriləcək

09 aprel 2010 07:09 (UTC +04:00)

Bakı. Nicat Mustafayev – APA-Economics. Bu ilin may ayının 19-21-də Britaniyanın «ITE Group» şirkətinin Qafqazdakı eksklyuziv tərəfdaşı olan «Iteca Caspian» şirkətinin təşkilatçılığı ilə Bakıda XVI Azərbaycan Beynəlxalq Qida Sənayesi Sərgisi («WorldFood Azerbaijan») keçiriləcək.

«Iteca Caspian» şirkətindən «APA-Economics»ə verilən məlumata görə, 100-dən artıq şirkətin iştirak edəcəyi sərgidə ət və quş məhsulları, konservləşdirilmiş məhsullar, süd məhsulları, dondurma, baqqaliyyə malları, meyvə və tərəvəzlər, uşaq və pəhriz qidaları, tütün məmulatları və digər ənənəvi bölmələr təqdim olunacaq.

Bundan başqa, 2010-cu ilin sərgisi bir neçə tematik ekspozisiyalara bölünəcək. Belə ki, «WorldFood Drink» bölümündə geniş çeşiddə alkoqollu və alkoqolsuz içkilər, «SeaFood» bölümündə isə dəniz məhsulları, onların saxlanması və daşınması üzrə bir çox xidmətlər təqdim olunacaq. «WorldFoodTech» bölümündə yeyinti sənayesinin müxtəlif istiqamətləri, supermarketlər, laboratoriya analizləri üçün avadanlıqlar, eləcə də istehsalın ilkin mərhələsi üçün nəzərdə tutulmuş mini-zavod avadanlıqları nümayiş etdiriləcək. «FoodPack» bölümünün stendlərində isə geniş çeşiddə Türkiyə, Rusiya və digər ölkələrin istehsalı olan qablaşdırma avadanlıqları ilə tanış olmaq mümkün olacaq.

Bununla yanaşı, bu il Qafqaz regionunda ilk dəfə olaraq «WorldFood Azerbaijan» sərgisi çərçivəsində Azərbaycan və digər ölkələrin «halal» ərzaq məhsulları istehsalçılarını bir araya gətirəcək «HalalFood» sərgisi də keçiriləcək. Qeyd edək ki, 2008-ci ilin statistik göstəricilərinə əsasən, bütün dünyada halal ərzaq məhsullarının bazarı 580 mlrd. ABŞ dolları təşkil edib.