Sahibkarlıq

Ana səhifə

Sahibkarlıq

Saxlama müddəti ötmüş 375 kq ərzaq məhsulları satışdan çıxarılaraq məhv edilib

12 aprel 2010 12:58 (UTC +04:00)

Bakı. Nicat Mustafayev - APA-Economics. Azərbaycan İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən növbəti monitorinq keçirilib.

Nazirlikdən «APA-Economics»ə verilən məlumata görə, monitorinq zamanı Bakının Xətai rayonunda M.Hadi küçəsi, 2344-cü məhəllədə yerləşən «Cənub market»də, M.Hadi küçəsi, 51, 2371-ci məhəllədə yerləşən «Röya market»də, Müşfiq Həmzəyevə məxsus mağazada, Gəncə prospekti, 13 ünvanında Validə Əliyevaya məxsus mağazada, General Səmədbəy Mehmandarov küçəsi, 2942 D məhəlləsində Elduzə Heydərovaya məxsus mağazada, Sarayev küçəsi, ev 18, mənzil 19 ünvanında yerləşən «Röya market»də, Babək prospekti, ev 64 ünvanında yerləşən «Məhəllə market»də, Gəncə şəhərində N.Nərimanov prospekti, 326 ünvanında yerləşən «Ceyhun market»də, Xaçmaz şəhərində 20 yanvar küçəsində yerləşən «Orxan market»də, Şəki şəhərində S.Rəhimov küçəsində yerləşən «Nuxa» ərzaq mağazasında, ümumi çəkisi 375 kiloqramdan çox saxlama müddəti ötmüş və normativ texniki sənədlərin tələblərinə uyğun olmayan ərzaq məhsulları, o cümlədən qənnadı məhsulları, kolbasa, konservləşdirilmiş məhsullar, balıq məhsulları, yağlar, un məmulatları, süd və süd məhsulları, sərinləşdirici içkilər, meyvə şirələri, pivə və s. aşkar olunub, satışdan çıxarılaraq məhv edilib.

Qanun pozuntusuna yol vermiş şəxslər barəsində İnzibati Xətalar Məcəlləsinə uyğun olaraq inzibati tədbirlər görüləcək.

Qeyd edək ki, bu ilin I rübü ərzində Dövlət Xidməti tərəfindən 329 ticarət obyektində monitorinq keçirilib və bu obyektlərdən 312-də qanun pozuntusu aşkar edilib. Bu tədbirlər nəticəsində mənşəyi məlum olmayan, saxlama müddəti ötmüş və normativ-texniki sənədlərin tələblərinə cavab verməyən 158,5 ton müxtəlif ərzaq məhsulları, o cümlədən ət və ət məhsulları, şəkər, bal və qənnadı məhsulları, süd və süd məhsulları, balıq məhsulları, konservləşdirilmiş məhsullar, sərinləşdirici içkilər və s. aşkar olunaraq satışdan çıxarılıb.