Sahibkarlıq

Ana səhifə

Sahibkarlıq

Saxlama müddəti ötmüş 400 kq ərzaq məhsulları satışdan çıxarılaraq məhv edilib

22 aprel 2010 16:04 (UTC +04:00)

Bakı. Elnur Hüseynquluyev - APA-Economics. Azərbaycan İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin keçirdiyi növbəti monitorinqlərin nəticələrini açıqlayıb.

Azərbaycan İqtisadi İnkişaf Nazirliyindən «APA-Economics»ə verilən məlumata görə, monitorinq zamanı Bakının Binəqədi, Nərimanov, Nəsimi, Nizami və Xətai rayonlarında, həmçinin Şabran, Gəncə və Samuxda fəaliyyət göstərən marketlərdə ümumi çəkisi 400 kiloqrama yaxın saxlama müddəti ötmüş və normativ texniki sənədlərin tələblərinə uyğun olmayan ərzaq məhsulları, o cümlədən qənnadı məhsulları, kolbasa, konservləşdirilmiş məhsullar, un məmulatları, süd və süd məhsulları, yağlar, sərinləşdirici içkilər, meyvə şirələri, çay, pivə və s. aşkar olunaraq satışdan çıxarılaraq məhv edilib.

Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən tikinti materialları bazarında da nəzarət tədbirləri davam etdirilir. Bakı şəhərində Nərimanov rayonu, Ə.Rəcəbli küçəsi, 1968-ci məhəllədə Samir Məmmədova məxsus kafel-metlax satışı obyektində aparılan yoxlama zamanı 9,2 ton normativ-texniki sənədlərin tələblərinə uyğun olmayan sement aşkar edilərək satışdan çıxarılıb.

Qanun pozuntusuna yol vermiş şəxslər barəsində Azərbaycan İnzibati Xətalar Məcəlləsinə uyğun olaraq inzibati tədbirlər görüləcək.