Sahibkarlıq

Ana səhifə

Sahibkarlıq

Azərbaycanda quşçuluq müəssisəsinin səhmlərinin satışı üzrə investisiya müsabiqəsi elan edilib

26 aprel 2010 07:43 (UTC +04:00)

Bakı. Rəşad Süleymanov – APA-Economics. Azərbaycan Əmlak Məsələləri Dövlət Komitəsi (ƏMDK) «Biləsuvar-Quşçuluq» ASC-nin səhmlərinin 30,02%-nin satışı üzrə investisiya müsabiqəsi elan edib.

ƏMDK-dən «APA-Economics»ə verilən məlumata görə, müsabiqədə yerli hüquqi və fiziki şəxsləri ilə yanaşı, xarici investorlar da iştirak edə bilərlər.

Biləsuvar rayonu, Səmədabad kəndində yerləşən səhmdar cəmiyyətinin nizamnamə kapitalı 788 242,8 manat, buraxılmış səhmlərin sayı 394 121 ədəd, səhmlərin növü sənədsiz adlı, bir səhmin nominal dəyəri 2 manatdır. İnvestisiya müsabiqəsində satışa ümumi nominal dəyəri 236 650 manat təşkil edən 118 325 səhm çıxarılıb. Səhmdar cəmiyyətinin digər müəssisələrdə iştirak payı və qeyri-maddi aktivləri yoxdur. Ekoloji vəziyyəti qənaətbəxş olan müəssisədə 80 nəfər çalışır. Səhmdar cəmiyyətinin cəmi öhdəlikləri 238 218 manat, o cümlədən əmək haqqı və ona bərabər tutulan borcları 7 min manat, mal, iş və xidmətlərə görə borcları 60 min manatdır. Müəssisənin debitor borcları isə 26 371 manat təşkil edir.

İddiaçılar səhmdar cəmiyyətinin səhmlərinin alqı-satqı müqaviləsi imzalandığı tarixdən 60 gün müddətində təklif olunmuş investisiya həcminin ümumi məbləğinin müəyyən hissəsinin 5%-ə qədərini pul vəsaiti şəklində müəssisənin hesabına köçürüləcək məbləğinə və ondan istifadəyə dair təklif və dövlət büdcəsinə ödəniləcək pul vəsaitinə dair təklifin verilməsi (35 min manat) verməlidirlər.

İddiaçıların ərizə və təkliflərinin qəbulu mayın 24-dək ƏMDK-nin inzibati binasında (Bakı şəhəri, Y. Səfərov küçəsi, 20. otaq 810, tel.: 490 24 08 (əlavə 242)) aparılacaq. Müsabiqə Komissiyası tərəfindən müsabiqə təkliflərinin qiymətləndirilməsi isə mayın 26-da keçiriləcək.