Sahibkarlıq

Ana səhifə

Sahibkarlıq

“Azersun Holding” yeni məhsulunu bazara təqdim edib

26 aprel 2010 10:39 (UTC +04:00)

Bakı. Rəşad Süleymanov - APA-Economics. “Azersun Holding” Şirkətlər Qrupu şokolad yağında “Şoki Moki” markası iki və bir rəngli məhsullarını satışa çıxarıb. Bu barədə «APA-Economics»ə «Azersun Holding»in mətbuat xidmətindən məlumat verilib.

Ötən ildən Bakı Yağ Fabrikinin nəzdində, Avropanın ən son texnologiyası əsasında qurulan şokolad yağının istehsal xətti istismara buraxılıb. Bu sahədə fəaliyyət göstərəcək işçi heyətinin təcrübə keçməsinə şərait yaradılıb və onlar şokolad yağı istehsalı ilə əlaqədar lazımi nəzəri və praktiki biliklərə yiyələnib.

“Həm dadlı, həm savadlı” şüarlı “Şoki-Moki” əcnəbi markalarla tam rəqabət aparmaq qabiliyyətindədir. Şirkətin məlumatında qeyd olunur ki, istehlakçılar “Şoki Moki” şokolad yağının 2 növünü - həm tək rəngdə, həm də ağ və qara şokolad əldə edə biləcəklər. “Şoki Moki”nin bir üstün cəhəti də hədiyyəli olmasıdır. Belə ki, şokolad yağının qapaqları altından heyvanlar aləminə aid oyuncaqlar və onun haqqında kiçik informasiya əldə etmək mümkündür.

Məhsulun istehsal olunduğu Bakı Yağ Fabriki günlük olaraq 6 ton (aylıq 150 ton) məhsul istehsal etmə potensialına malikdir, lakin xətt tam gücü ilə istismara veriləndə bu rəqəmin tək rəngli məhsulda günlük olaraq 10 ton (aylıq 250 ton ), iki rəngli məhsulda isə 12 ton (aylıq 300 ton) olacağı gözlənilir.