Sahibkarlıq

Ana səhifə

Sahibkarlıq

Bakıda Azərbaycan-Stavropol biznes-forumu keçirilib

27 aprel 2010 14:24 (UTC +04:00)

“APA-Economics”in məlumatına görə, tədbir Azərbaycan iqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (“Azpromo”) və Stavropol diyarı qubernatorluğunun təşkilatçılığı baş tutub.

Biznes-forumda çıxış edən Azərbaycan baş nazirinin müavini Əli Həsənov ölkənin iqtisadi inkişafından söz açıb. O bildirib ki, 2010-cu ilin ilk rübündə Azərbaycanda ÜDM 5,4%, sənaye 5,6%, kənd təsərrüfatı 1,5% artıb, inflyasiya 3,8%, strateji valyuta ehtiyatları isə 22,3 mlrd. dollar təşkil edib.

Ə.Həsənov Azərbaycanın hazırda Rusiyanın 81 subyekti, 71 regionu ilə əməkdaşlıq etdiyini vurğulayıb: “2009-cu ildə Rusiya ilə ticarət dövriyyəsinin həcmi 1 mlrd. 816 mln. dollar, o cümlədən Stavropol diyarı ilə 123,3 mln. dollar təşkil edib. Bu isə 2004-cü illə müqayisədə 2 dəfə çoxdur”.

Çıxışının sonunda Ə.Həsənov sabah Azərbaycan və Stavropol diyarı arasında ticarət-iqtisadi, elmi-texniki və mədəniyyət sahələrində ikitərəfli əməkdaşlığa dair sazişlərin imzalanacağını söyləyib.

Stavropol diyarının qubernatoru Valeri Qayevski qeyd edib ki, 2009-cu ildə tərəflər arasında ticarət dövriyyəsinin həcmi 2008-ci illə müqayisədə 30% artıb: “2008-ci ildə bu göstərici 200 mln. dollardan artıq olub. Hazırda Stavropolda 15 mindən artıq azərbaycanlı yaşayır. İki tərəf arasında prioritet sahələr kənd təsərrüfatı, sənaye və turizm sahələridir. Stavropolda istehsal olunan taxılın xaricə satılması üçün ötürücü terminal Azərbaycanda tikiləcək. Eyni zamanda Stavropol diyarının neft emalı zavodunun tikintisinə ehtiyacı var”.

Azərbaycan iqtisadi inkişaf nazirinin müavini Niyazi Səfərov tədbirdə hər iki tərəfdən 120 sahibkarın iştirak etdiyini söyləyib: “Keçirilən ikitərəfli görüşlər nəticəsində əlaqələrimizin daha da inkişaf edəcəyinə inanıram”.