Sahibkarlıq

Ana səhifə

Sahibkarlıq

Bakıda keyfiyyətsiz çörək və süd məhsulları istehsal edən müəssisələr aşkarlanıb - FOTO

Bakıda keyfiyyətsiz çörək və süd məhsulları istehsal edən müəssisələr aşkarlanıb - <font color=red>FOTO</font>

27 aprel 2010 14:33 (UTC +04:00)

Bakı. Aynur Vəliyeva - APA-Economics. Azərbaycan Standartlaşdırma, Metrologiya və Patent üzrə Dövlət Komitəsinin 1 saylı Ərazi Dövlət Nəzarəti İdarəsinin əməkdaşları keyfiyyətsiz çörək və süd məhsulları istehsalı ilə məşğul olan müəssisələr aşkar ediblər.

Komitənin mətbuat xidmətindən «APA-Economics»ə verilən məlumata görə, 1 saylı Ərazi Dövlət Nəzarəti İdarəsinin əməkdaşlarının növbəti monitorinqi zamanı antisanitar vəziyyətdə fəaliyyət göstərən, normativ-texniki sənədlərin tələblərindən kənar məhsul istehsal edən bir neçə müəssisə aşkar edilib.

Belə ki, Bakıda Mətbuat prospektində, “Azərbaycan” nəşriyyatının həyətində yerləşən Cavadov Zabit Əli oğluna məxsus çörək sexində istehsal prosesinin kobud şəkildə pozulduğu, müəssisənin normativ-texniki sənədlərlə təmin olunmadığı, standartdan kənar çörək istehsal olunduğu müəyyən olunub. Təsərrüfat subyektinin rəhbəri istehsal zamanı istifadə olunan duzun göldən yığılaraq yodlaşdırılmadan xəmirə vurulduğunu etiraf edib.

Bununla yanaşı, Bakının Nərimanov rayonu, 8-ci Köndələn küçəsində yerləşən çörək istehsal edən müəssisədə də analoji hal qeydə alınıb. Fiziki şəxs R.Z.Mirzəyevə məxsus Sexdə keçirilən monitorinq zamanı “Pəhriz çörəyi” adı altında normativ sənədin tələblərinə cavab verməyən məhsul istehsal olunduğu müəyyən olunub. Təsərrüfat subyektinin rəhbəri etiraf edib ki, məhsul “Pəhriz çörəyi” adı ilə markalansa da, istehsalda I növ buğda və kəpək unundan istifadə olunub, bu isə istehlakçıların hüquqlarının kobud şəkildə pozulması deməkdir.

Eyni zamanda Bakının Suraxanı rayonu, Qaraçuxur qəsəbəsi, Vağzal küçəsində süd məhsullarının istehsalı ilə məşğul olan müəssisədə aşkar olunmuş hazır nümunələrin bir qisminin üzərində istehsalçı kimi fiziki şəxs N.Q.Təhməzova, bir qismində isə “Qaraçuxur” MMC göstərilib. Müəssisədə 228 ədəd 500 ml-lik üzərində istehsal tarixi olmayan hazır ayran, 45 ədəd “dietik kəsmik” adı altında 9% yarım yağlı kəsmik, istifadə müddəti standartda nəzərdə tutulandan artıq qeyd olunan 198 ədəd dovğa, 56 ədəd qatıq məhsulları aşkar olunub. Məhsulların kustar yolla hazırlandığı, qablaşdırıldığı və markalandığı müəyyən olunub.

Bütün hallarda Standartlaşdırma, Metrologiya və Patent üzrə Dövlət Komitəsinin əməkdaşları məhsul istehsalının dayandırılması ilə bağlı göstəriş verib, müəssisələrə inzibati sanksiyaların tətbiq olunacağı ilə bağlı qərar qəbul edilib.