Sahibkarlıq

Ana səhifə

Sahibkarlıq

SKMF Azərbaycan sahibkarlarına daha 634 min manat güzəştli kredit verib

07 may 2010 12:40 (UTC +04:00)

Bakı. Nicat Mustafayev - APA-Economics. Bu gün Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) Xocavənd rayonunda «Regionlarda sahibkarlığın inkişafına dövlət dəstəyi» mövzusunda tədbir keçirib.

Nazirlikdən «APA-Economics»ə verilən məlumata görə, tədbirdə Yuxarı Qarabağ iqtisadi rayonunda fəaliyyət göstərən 150-yə yaxın sahibkar iştirak edib.

İqtisadi İnkişaf Nazirliyinin Sahibkarlığın inkişafı siyasəti şöbəsinin müdir müavini Elçin İbrahimov və Regionların inkişafı və dövlət proqramları şöbəsinin müdir müavini Fərrux Dadaşov tədbirdə çıxış edərək hazırda Azərbaycanda iqtisadiyyatın bütün sahələrində ciddi nailiyyətlərin qazanıldığını, özəl bölmənin inkişafına böyük diqqət və qayğı göstərildiyini, regionların tarazlı inkişafının təmin olunmasında dövlət proqramlarının uğurlu icrasının əhəmiyyətini vurğulayıblar.

Nazirliyin Bakı Biznes Tədris Mərkəzinin direktor müavini Rahim Mürsəlov sahibkarların maarifləndirilməsi sahəsində görülən işlər və həyata keçirilməsi nəzərdə tutulan tədbirlər barədə iştirakçıları məlumatlandırıb.

SKMF-in icraçı direktoru Şirzad Abdullayev isə Fondun fəaliyyəti və 2010-cu ildə güzəştli kreditlərin yönəldiləcəyi prioritet sahələr barədə tədbir iştirakçılarına geniş məlumat verib və qeyd edib ki, «2008-2015-ci illərdə Azərbaycanda əhalinin ərzaq məhsulları ilə etibarlı təminatına dair Dövlət Proqramı»na uyğun olaraq SKMF-in güzəştli kreditləri hesabına regionların inkişafı, yeni iş yerlərinin açılması, ixracyönümlü məhsul istehsalı baxımından əhəmiyyətli olan bir sıra layihələr maliyyələşdirilib. Bu yaxınlarda isə Fond ölkə əhalisinin quş ətinə olan tələbatının daha dolğun ödənilməsi üçün müasir standartlara cavab verən ətlik istiqamətli quşçuluq (o cümlədən damazlıq broyler) təsərrüfatlarının yaradılması və ya müasir texnologiyaların tətbiqi ilə yenidən qurulması üzrə investisiya layihələrinin maliyyələşdirilməsi, eyni zamanda “Azərbaycan regionlarının 2009-2013-cü illərdə sosial-iqtisadi inkişafı Dövlət Proqramı»na uyğun olaraq ölkənin 27 inzibati rayon və şəhəri üzrə prioritet hesab olunan və iqtisadiyyatın müxtəlif sahələrini əhatə edən investisiya layihələrinin güzəştli qaydada maliyyələşdirilməsi üçün layihələrin qəbulunu elan edib.

Tədbir çərçivəsində həmçinin müvəkkil kredit təşkilatları vasitəsilə Xocavənd və ətraf rayonlarda fəaliyyət göstərən 47 sahibkarlıq subyektinə 634 min manat məbləğində güzəştli kreditlər verilib. Bu kreditlər hesabına 85-dən çox yeni iş yerinin yaradılması nəzərdə tutulur.