Sahibkarlıq

Ana səhifə

Sahibkarlıq

Gələn həftə Azərbaycanda daha bir beynəlxalq sərgi keçiriləcək

11 may 2010 11:58 (UTC +04:00)

Bakı. Aynur Vəliyeva - APA-Economics. May ayının 19-21-də Bakıda «Iteca Caspian Llc.» və «ITE Group Plc.» şirkətlərinin təşkilatçılığı ilə XVI Azərbaycan Beynəlxalq Qida Sənayesi Sərgisi («WorldFood Azerbaijan-2010») keçiriləcək.

«Iteca Caspian» şirkətindən «APA-Economics»ə verilən məlumata görə, «WorldFood Azerbaijan» sərgisi sənaye mütəxəssisləri üçün peşakar platforma rolunu oynayır. Sərgidə yeni əlagələr qurmaq və mövcud əlaqələri möhkəmləndirməklə yanaşı, qida məhsulları bazarının yenilikləri və inkişaf tendensiyaları barədə ətraflı məlumat almaq imkanı təqdim edilir.

Bu il «WorldFood Azerbaijan» sərgisində Azərbaycan, Belarus, Bolqarıstan, Macarıstan, İran, BƏƏ, Pakistan, Rusiya, ABŞ, Türkiyə, Ukrayna və digər ölkələrdən olan 120-dən çox şirkətin iştirak edəcəyi gözlənilir. «WorldFood Azerbaijan-2010» sərgisi bir neçə tematik ekspozisiyalara bölünərək qida sənayesinin demək olar ki, bütün istiqamətlərini əhatə edir. «WorldFood Drink» bölümündə geniş çeşiddə içkilər, «SeaFood» bölümündə isə dəniz məhsulları, onların saxlanılması və daşınması ilə əlaqədar olan bütün növ xidmətlər təqdim olunacaq. «FoodPack» bölümünün stendlərində isə geniş çeşiddə Azərbaycan, Türkiyə, Rusiya və digər ölkələrin istehsalı olan qablaşdırma avadanlıqları təqdim olunacaq. «WorldFoodTech» bölümündə qida sənayesinin müxtəlif istiqamətləri, o cümlədən supermarketlər, laboratoriya analizləri üçün avadanlıqlar nümayiş etdiriləcək. Qeyd etmək lazımdır ki, bu il istehsalın ilkin mərhələsi üçün nəzərdə tutulmuş mini zavodlar kimi ilkin istehsal avadanlıqlarına həsr edilmiş ekspozisiyaların sayı çox olacaq. Sərgidə ət və quş məhsulları, konservləşdirilmiş məhsullar, süd məhsulları, dondurma, baqqaliyyə malları, meyvə və tərəvəzlər, uşaq və pəhriz qidaları, tütün məmulatları və digər ənənəvi bölmələr təqdim olunacaq.

Bu il Qafqaz regionunda ilk dəfə olaraq «WorldFood Azerbaijan» sərgisi çərçivəsində Azərbaycan və digər ölkələrin «halal» ərzaq məhsulları istehsalçılarını bir araya gətirəcək «HalalFood Azerbaijan» sərgisi keçiriləcək. Bu gün qida sənayesinin bu sektoru ən sürətlə inkişaf edən sektorlardan biridir və 2008-ci ilin statistik göstəricilərinə əsasən, bütün dünyada halal ərzaq məhsulları bazarı 580 mlrd. dollar təşkil edib.