Sahibkarlıq

Ana səhifə

Sahibkarlıq

Bakıda Azərbaycan-Serbiya biznes-forumu keçirilir

13 may 2010 09:21 (UTC +04:00)

“APA-Economics”in məlumatına görə, Azərbaycan İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (“Azpromo”) təşkilatçılığı ilə keçirilən tədbirin açılış mərasimində çıxış edən Azərbaycan iqtisadi inkişaf nazirinin müavini Niyazi Səfərov bildirib ki, Azərbaycan Serbiya ilə əlaqələrin genişləndirilməsində maraqlıdır: “Ümid edirəm ki, ilk biznes-forum iki ölkə arasında ticarət-iqtisadi əlaqələrin inkişafına öz töhfəsini verəcək”.

N.Səfərov qeyd edib ki, 2009-cu ildə Azərbaycanda ÜDM 9,3%, sənaye sahəsi 12,8%, kənd təsərrüfatı 3,5%, əhalinin gəlirləri isə 8% artıb: “Bu ilin birinci rübündə ölkədə ÜDM 5,4%, əhalinin minimal gəlirləri 6,5% artıb. Bu günədək ölkə iqtisadiyyatına 70 mlrd. ABŞ dollarından çox sərmayə yatırılıb ki, bunun da yarıdan çoxu xarici investisiyadır”.

Ölkədə biznes mühitinin əlverişli olduğunu deyən nazir müavini qeyd edib ki, hazırda ÜDM-in 85%-i özəl sektorun payına düşür.

Serbiyanın İqtisadiyyat və Regional İnkişaf Nazirliyinin dövlət katibi Ciric Neboyja bildirib ki, 2008-ci ildə ölkənin iqtisadi atımı 7-8% civarında olub, 2009-cu ildə isə ÜDM 3% azalıb. Bu ilin sonunda 2%-lik iqtisadi artım və 3 mlrd. dollar xarici investisiyanın yatırılması gözlənilir: “Azərbaycanla Serbiya arasında ticarət dövriyyəsinin 2009-cu ildə azalaraq 5 mln. dollar olub ki, bunun da 4 mln. dollarını Serbiyadan Azərbaycana idxal olunan, 1 mln. dollarını isə Azərbaycandan ixrac olunan məhsullar təşkil edib. Ticarət dövriyyəsini 100-150 mln. dollara çatdırmaq üçün bütün imkanlar mövcuddur. İkinci biznes-forumun bu ilin sentyabr-oktyabr aylarında Belqradda keçirilməsi nəzərdə tutulur. Serbiya şirkətləri Azərbaycana investisiya qoymaq niyyətindədir, eləcə də Azərbaycandan investisiya cəlb etmək planlaşdırılır”.

Tədbirdə həmçinin “Azpromo”nun prezidenti Adil Məmmədov Azərbaycanın biznes imkanları və investisiya mühiti, Azərbaycan İnvestisiya Şirkətinin icraçı direktoru Əfqan İsayev qurumun fəaliyyəti və həyata keçirdiyi layihələr, Serbiyanın Biznes Assosiasiyasının prezidenti Bronislav Krojiç isə ölkəsinin iqtisadi imkanları haqda təqdimatlarla çıxış edib.

Qeyd edək ki, biznes-forumda hər iki ölkənin 40-a yaxın şirkəti iştirak edir. Onlar kənd təsərrüfatı, tikinti, mebel, kosmetologiya, enerji, neft, əczaçılıq və tekstil sahələrini təmsil edirlər.