Sahibkarlıq

Ana səhifə

Sahibkarlıq

Gəncədə «İstehlakçı hüquqlarının qorunmasında sahibkarların vəzifələri» mövzusunda konfrans keçirilib

14 may 2010 12:34 (UTC +04:00)

Bakı. Nicat Mustafayev - APA-Economics. Bu gün Gəncədə Azərbaycan İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin təşkilatçılığı ilə «İstehlakçı hüquqlarının qorunmasında sahibkarların vəzifələri» mövzusunda konfrans keçirilib.

Nazirlikdən «APA-Economics»ə verilən məlumata görə, tədbirdə Gəncə-Qazax iqtisadi rayonunda fəaliyyət göstərən 150-dən çox sahibkar iştirakı edib.

Tədbirdə çıxış edən İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin rəisi Zahid İsayev qeyd edib ki, iqtisadiyyatın inkişafı, əhalinin gəlirlərinin yüksəlməsi insanların müxtəlif mallara, xidmətlərə olan tələbatını da artırıb, nəticə etibarilə istehlakçıların öz hüquqlarının müdafiəsinə daha çox əhəmiyyət verməsinə gətirib çıxarıb, istehlakçıların hüquqlarının müdafiəsi ölkədə mühüm əhəmiyyət kəsb edən məsələlərdən birinə çevrilib. Azərbaycanda istehsalın həcminin genişləndiyini, malların və xidmətlərin çeşid və növlərinin artdığını diqqətə çatdıran Xidmət rəisi istehlak bazarında hələ də normativ-texniki sənədlərin tələblərinə cavab verməyən, saxlanma və yararlılıq müddətləri ötmüş, mənşəyi məlum olmayan, qanunvericilikdə müəyyən edilmiş qaydada sertifikatlaşdırılmayan, saxtalaşdırılmış, insan həyatı və sağlamlığı üçün təhlükəli məhsulların satılması hallarının müşahidə olunduğunu qeyd edib və bildirib ki, 2010-cu ilin yanvar-aprel ayları ərzində Dövlət Xidməti tərəfindən mənşəyi məlum olmayan, saxlama müddəti ötmüş və normativ-texniki sənədlərin tələblərinə uyğun etiketlənməmiş 620 ton müxtəlif növ ərzaq məhsulları satışdan çıxarılıb. Bu məhsulların 112,7 tonu məhv edilib, 30,3 tonu təkrar emala göndərilib, 262 tonu normativ-texniki sənədlərin tələblərinə uyğun etiketləndikdən sonra satışa qaytarılıb və 215 tonu ilə bağlı araşdırmalar davam etdirilir. Bundan başqa, yanvar-aprel ayları ərzində yuxarıda qeyd edilən səbəblərdən 239,6 ton qeyri-ərzaq malları satışdan çıxarılıb, bu malların 12,4 tonu məhv edilib, 212,7 tonu müvafiq qaydada etiketləndikdən sonra satışa qaytarılıb, 14,5 tonu isə araşdırmalar üçün məsul saxlamaya verilib. Hesabat dövründə qanun pozuntusuna yol vermiş sahibkarlıq subyektləri barəsində Dövlət Xidməti tərəfindən Azərbaycan İnzibati Xətalar Məcəlləsinə uyğun olaraq ümumilikdə 472 qərar qəbul olunub və inzibati xətaya yol vermiş şəxslər 726,4 min manat məbləğində cərimə edilib.

Konfransda həmçinin İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin nümayəndələri «İstehlakçı hüquqlarının müdafiəsi ilə bağlı görülən işlər və qarşıda duran vəzifələr», «Qüsurlu mal satılarkən istehlakçının hüquqlarının təmin edilməsində sahibkarların vəzifələri», «İstehlakçı hüquqlarının pozulmasına görə məsuliyyət», «İstehlakçıların keyfiyyətli və təhlükəsiz mallarla təmin edilməsində sahibkarların vəzifələri» mövzusunda məruzələrlə çıxış edib, istehlakçı hüquqlarının qorunması, bu sahədə sahibkarların üzərinə düşən vəzifələr barədə tədbir iştirakçılarına geniş məlumat verib.