Sahibkarlıq

Ana səhifə

Sahibkarlıq

Qazaxıstanın Aktau şəhərinin nümayəndə heyəti Sumqayıtda olub

19 may 2010 13:59 (UTC +04:00)

Sumqayıt. Rəşad Süleymanov - APA-Economics. Sumqayıt şəhər İcra Hakimiyyətinin başçısı Vaqif Əliyev Qazaxıstanın Aktau şəhərinin nümayəndə heyətini qəbul edib.

Sumqayıt şəhər İcra Hakimiyyətindən «APA-Economics»ə verilən məlumata görə, Aktau şəhərinin yeni akimi Ospan Qazaxbayevin rəhbərlik etdiyi nümayəndə heyəti ilə Sumqayıt və Aktau şəhərləri arasında ikitərəfli əlaqələrin inkişaf perspektivləri müzakirə edilib. Şəhərlər arasında əməkdaşlığın daha da genişləndirilməsi barədə ətraflı fikir mübadiləsi aparılıb. Danışıqların nəticəsi kimi şəhər rəhbərləri yaxın müddətdə Aktau və Sumqayıtın iş adamlarının iştirakı ilə Qazaxıstanda biznes-forumun keçirilməsi barədə razılığa gəliblər.

Birgünlük səfər çərçivəsində nümayəndə heyəti Sumqayıt Tarix Muzeyinin əsaslı təmir və yenidənqurmadan sonra açılış mərasiminə, III Ümumrespublika Kitab Bayramı çərçivəsində Nizami meydanında təşkil olunacaq Kitab Bayramına qatılacaq, eyni zamanda Sumqayıt şəhərinin sənaye müəssisələri ilə tanışlıq imkanı əldə edəcək.

Xatırladaq ki, 3 oktyabr 2009-cu ildə Sumqayıt və Aktau şəhərləri arasında qardaşlaşmış şəhər münasibətlərinin yaradılması haqqında Birgə Bəyannamə imzalanıb. Birgə Bəyannamə tərəflər arasında təhsil, elm, səhiyyə, idman və mədəniyyət də daxil olmaq geniş spektr üzrə əməkdaşlıq əlaqələrinin inkişafını nəzərdə tutur.