Sahibkarlıq

Ana səhifə

Sahibkarlıq

Abşeron rayonunun 10 qəsəbəsində sahibkarlığın vəziyyəti ilə bağlı keçirilən sosioloji sorğunun nəticələri açıqlanıb

25 may 2010 09:55 (UTC +04:00)

Bak. Elnur Hüseynquluyev - APA-Economics. Azərbaycanda Regional İnkişaf Mərkəzi (ARİM) AVCİYA-nın dəstəyi ilə bu ilin aprel-may aylarında Abşeron rayonunun 10 qəsəbəsində (Mərdəkan, Hövsan, Novxanı, Maştağa, Fatmayi, Qala, Bilgəh, Şağan, Pirşağı və Şüvəlan) əhali arasında sahibkarlığın vəziyyəti ilə bağlı apardığı sosioloji sorğunun nəticələrini açıqlayıb.

ARİM-in rəhbəri Çingiz İsmayılovun sözlərinə görə, sorğuda 500 respondent iştirak edib və təsadüfü seçim əsasında respondentlər müxtəlif yaş-cins və sosial qruplarından ibarət olub. Bununla yanaşı sorğuda iştirak edənlərin yarıdan çoxu sahibkarlıq sahəsində çalışan olub.

Çingiz İsmayılov bildirib ki, “qəsəbələrin kənd təsərrüfatı sahəsi lazımı dərəcədə inkişaf etdirilirmi?” sualına respondentlərin 50%-i qəsəbələrdə sahibkarlığın inkişaf etdirildiyini qeyd edib.

“Sizin qəsəbədə sahibkarlığın inkişafına əlverişli şərait varmı?” sualına isə respondentlərin 50%-i şəraitin olduğunu, 29% olmadığını, 21% isə suala cavab verməkdə çətinlik çəkdiyini bildirib.

Ç.İsmayılov qeyd edib ki, sosioloji sorğu nəticəsində qəsəbələrdə sahibkarlığın inkişafı üçün kifayət qədər problemlərin olduğu müəyyənləşib. Bunlardan ən başlıcası korrupsiya, məmurların təzyiqləri, inhisarçılıq və sahibkarlığını inkişafı üçün lazımi şəraitin olmamasıdır: «Bunun nəticəsində Abşeron qəsəbələrində yaxın gələcəkdə orta və kiçik sahibkarlığın inkişafındakı problemlərin daha da kəskinləşməsini gözləmək olar. Ölkəmizdə aparılan islahatların əks-sədası Abşeron qəsəbələrində çox cüzi dərəcədə hiss olunur və bu səbəbdən yerli sakinlər özlərinin yaşayış rifahının dəyişməsini pozitiv dəyərləndirmirlər».