Sahibkarlıq

Ana səhifə

Sahibkarlıq

Azərbaycanda Rusiya istehsalı olan təhlükəli ət konservləri satışdan yığışdırılıb

01 iyun 2010 11:49 (UTC +04:00)

Bakı. Nicat Mustafayev - APA-Economics. Azərbaycanın ticarət şəbəkəsindən Rusiya istehsalı olan mal əti konservləri satışdan çıxarılır.

Azərbaycan İqtisadi İnkişaf Nazirliyindən «APA-Economics»ə verilən məlumata görə, Nazirlik yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən Rusiyanın «Oryol Produkt» QSC-nin Oryol vilayəti, Mtsensk şəhəri, Promışlennaya küçəsi, ev 2A ünvanında yerləşən istehsalat sahəsində istehsal olunmuş «Qlavprodukt» nişanlı 525 qramlıq «Tuşenaya Qovyadina» adlı mal əti konservlərinin tərkibində toksiki elementlərin normadan artıq olduğu aşkar edilib, bununla əlaqədar idxalçı şirkətlərə bu malların satışdan çıxarılması ilə bağlı icrası məcburi göstəriş verilib. Hazırda insan sağlamlığı üçün təhlükəli ət konservlərinin satışdan çıxarılması ilə bağlı tədbirlər davam etdirilir. İndiyədək 1 500 kiloqramdan artıq bu cür ət konservləri satışdan çıxarılıb.

Dövlət Xidmətinin bu tədbirlər çərçivəsində pərakəndə ticarət obyektlərindən götürdüyü müxtəlif çəkili (325 və 425 qramlıq) «Qlavprodukt» nişanlı «Tuşenaya Qovyadina» adlı mal əti konservlərinin və donuz ciyərindən hazırlanmış 90 qramlıq paştetin tərkibində də toksiki elementlərin normadan artıq olduğu müəyyən edilib. Hazırda həmin malların məhv edilməsi ilə əlaqədar tədbirlər görülür.