Sahibkarlıq

Ana səhifə

Sahibkarlıq

Lənkəranda 15 ticarət obyektinin fəaliyyəti dayandırılıb

02 iyun 2010 15:31 (UTC +04:00)

Lənkəran. Ağəddin Babayev – APA. Azərbaycanın Lənkəran rayonunda 15 ticarət obyektinin fəaliyyəti dayandırılıb. Bu barədə APA-nın cənub bürosuna Lənkəran Rayon Gigiyena və Epidemiologiya Mərkəzindən RGEM) məlumat verilib.

Məlumata görə, istifadə müddəti ötmüş yararsız qida məhsullarının aşkarlanması, həmçinin rayonun ərazisində məişət tullantılarının vaxtında daşınmasının qaydaya salınması məqsədilə Lənkəran Şəhər İcra Hakimiyyəti başçısının müvafiq sərəncamı ilə Ekologiya və Təbii Sərvətlər Nazirliyinin 1 saylı ərazi üzrə regional idarəsi, rayon abadlıq kombinatı, eləcə də KİV əməkdaşlarından ibarət briqada müxtəlif ticarət obyektlərində və rayonun ayrı-ayrı ərazilərində reydlər keçirib.

Reydlər zamanı bir sıra mağazalarda vaxtı ötmüş, keyfiyyət sertifikatı olmayan ərzaq məhsullarının satıldığı, məişət tullantılarının daşınmasında isə bəzi sahibkarlar tərəfindən səhlənkarlığa yol verildiyi aşkarlanıb və nəticə etibarı ilə 15 ticarət obyektin fəaliyyətinə xitam verilib, 19 müəssisə haqqında isə inzibati cəza tədbirləri görülüb. Reydlər zamanı həmçinin 100 kiloqramdan artıq vaxtı ötmüş ərzaq məhsulu aşkar edilərək dövriyyədən çıxarılıb.