Sahibkarlıq

Ana səhifə

Sahibkarlıq

Azərbaycanda sahibkarlar üçün elektron ticarət portalı yaradılıb

10 iyun 2010 13:59 (UTC +04:00)

«APA-Economics»in məlumatına görə, tədbirdə çıxış edən Azərbaycanın iqtisadi inkişaf nazirinin müavini xanım Sevinc Həsənova ölkənin iqtisadi inkişafından danışıb və qeyd edib ki, son 6 il ərzində ölkədə ÜDM 3 dəfə, qeyri-neft sektoru 2 dəfə, kənd təsərrüfatı sahəsi 3 dəfə, əhalinin gəlirləri 3 dəfədən çox artıb, yoxsulluğun səviyyəsi isə 4 dəfə azalaraq ötən il 11%-ə düşüb. Sahibkarların və ümumiyyətlə özəl sektorun son illər ərzində inkişaf etdiyini bildirən nazir müavini onu da qeyd edib ki, 2009-cu ildə özəl sektorun ÜDM-dəki payı 80%-ə çatıb: «Bütün bu nailiyyətlərə baxmayaraq müəyyən problemlər mövcuddur. Belə ki, hazırda sahibkarlar məhsullarının satışında çətinliklərlə üzləşir, istehsalçı və istehlakçı arasında lazımi əlaqə yoxdur. Məhz bu promblemlərin aradan qaldırlması məqsədilə Nazirlik və GTZ elektron ticarət portalını yaradıb».

Nazir müavininin sözlərinə görə, portal Azərbaycanda istehsal olunan məhsulların satışı üçün yaradılıb ki, burada istifadəçilər öz məhsul və təkliflərini, həmçinin alıcılar öz tələblərini yerləşdirə bilər: «Hazırda Azərbaycanda kənd təsərrüfatı məhsullarının satışında müəyyən problemlər mövcuddur ki, portal bunların aradan qaldırılması istiqamətində atılan addımdır. Belə ki, mal və məhsullar nəinki daxili, həmçinin xarici bazarlarda da satıla bilər».

S.Həsənova onu da qeyd edib ki, rayonlarda fəaliyyət göstərən sahibkarlara e-portalın istifadəsi ilə bağlı İqtisadi İnkişaf Nazirliyinin müvafiq qurumları yardım edəcək.

Tədbirdə çıxış edən GTZ-nin iqtisadçısı xanım Sandra Dömpke qeyd edib ki, son 10 il ərzində Azərbaycan sürətlə inkişaf edib. Portalın davamlı inkişafın yaradılmasında rol oynayacağını bildirən S.Dömpke istehsalçı və istehlakçı arasında əlaqələrin yaradılmasına yardm göstərəcəyini bildirib.

Qeyd edək ki, www.b2b.az ünvanlı elektron ticarət portalı 3 dildə (Azərbaycan, rus və ingilis) fəaliyyət göstərir. Sahibkarlıq subyektləri portalın xidmətlərindən istifadə etmək üçün orada qeydiyyatdan keçib fəaliyyət sahəsində asılı olmayaraq təklif etdiyi məhsul və xidmətləri barədə ətraflı məlumat yerləşdirə bilər.