Sahibkarlıq

Ana səhifə

Sahibkarlıq

IFC Azərbaycandakı ailə şirkətləri üçün idarəetmə ilə bağlı təlimat keçirib

11 iyun 2010 09:13 (UTC +04:00)

Bakı. Nicat Mustafayev – APA-Economics. Bu gün Bakıda Beynəlxalq Maliyyə Korporasiyası (IFC) ailə şirkətlərinin idarə olunmasına dair təlimat keçirib.

«APA-Economics»in məlumatına görə, tədbirdə bir çox ailə şirkətlərinin mürəkkəbliyi, o cümlədən qeyri-formallığı və zəif işəgötürmə təcrübələri, onların davamlı fəaliyyətinə təhlükə yarada biləcək səmərəsizlik və daxili konfliktlərə gətirib çıxara biləcəyi qeyd olunub: «Ailə şirkətləri bir çox inkişaf edən ölkələrin iqtisadi artımında və iş yerlərinin yaradılmasında əsas rol oynamaqla, dünyada ən çox yayılmış biznes növüdür. Lakin, ailə şirkətlərinin əksəriyyəti qısa ömür sürür və onların 95%-i sonrakı nəsillərin nizam-intizama malik olmaması və biznesin və ailənin artan tələblərini ödəmək üçün hazırlıqlı olmaması səbəbindən üçüncü nəsilndən sonra artıq mövcud olmur».

Bununla yanaşı bildirilib ki, xarici bazarlarda ailə biznesləri ÜDM-in 50-90%-ni təşkil edir. Hindlistanda 16 ailə şirkəti özəl sektorun aktivlərinin 65%-ni, Çilidə isə ailə şirkətləri Santyaqo fond birjasının bazar kapitallaşmasının 50%-ni təşkil edir: «Bununla belə, ailə biznesinin 67-75%-i ya iflasa məruz qalır, ya da sahibi tərəfindən satılır. Yalnız 5-15%-i ailənin üçüncü nəslinə keçir».

Bakıda keçirilən təlimat isə məhz ailə şirkətlərinə xas olan korporativ idarəetmə məsələrinə diqqət yetirir, bu çətinlikləri yumşalda biləcək modelləri və praktikaları təklif edir və beləliklə sahibkarlıq fəaliyyətinin davamlılığına şərait yaradır. Təlimatda həmçinin ailə şirkətlərinə müstəqil və yaxşı təşkil olunmuş direktorlar şurasının və hər bir şirkətin idarə edilməsi üçün mühüm olan peşəkar menecment komandasının yaradılması tövsiyyə olunub.

«Təlimat Azərbaycanın ailə şirkətlərinə ailə biznesinin idarə edilməsi məsələlərini başa düşməyə və həll etməyə kömək edəcək, kapitalın və nüfuzun artırılmasına, həmçinin investisiya cəlb etməyə yardım göstərəcək. Bu sənəd öz idarəetmə təcrübələrini təkmilləşdirmək və davamlı fəaliyyətini təmin etmək istəyən şirkətlər üçün təlimat xarakteri daşıyacaq», - deyə IFC-nin Azərbaycanda Korporativ İdarəetmə Layihəsinin rəhbəri xanım Karolina Brayt bildirib.

Qeyd edək ki, hazırda təlimat 14 dildə mövcuddur, bu da IFC-nin müştərilərinin və digər beynəlxalq təşkilatların bu məlumata olan yüksək tələbatının olması ilə bağlıdır.