Sahibkarlıq

Ana səhifə

Sahibkarlıq

Bu il Azərbaycanda sahibkarlara 115 mln. manatlıq güzəştli kreditlər veriləcək

17 iyun 2010 10:25 (UTC +04:00)

Bakı. Nicat Mustafayev – APA-Economics. Bu ilin sonunadək Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) ölkənin sahibkarlar subyektlərinə 115 mln. manat həcmində güzəştli kredit verəcək. «APA-Economics»in məlumatına görə, bunu SKMF-in icraçı direktoru Şirzad Abdullayev bildirib.

Onun sözlərinə görə, cari ilin əvvəlindən investisiya layihələrin maliyyələşdirilməsi üçün Fond tərəfindən sahibkarlara 42,5 mln. manat məbləğində güzəştli kreditlər verilib: «Bu ilin sonunadək SKMF sahibkarlara 115 mln. manat həcmində kredit ayıracaq. Layihələr çox olarsa biz beynəlxalq maliyyə qurumlarından əlavə vəsaitin cəlb olunması üçün tədbirlər görəcəyik».

Fondun rəhbəri həmçinin bildirib ki, dövlət büdcəsindən bu il SKMF-a 44 mln. manatın ayırılacağı nəzərdə tutulub və bu məbəlğin 35 mln. manatı artıq Fonda daxil olub: «Daha 71 mln. manat Fonda əvvəllər verilən kreditlərin qaytarılması hesabına daxil olub ki, bu da bizə ilin sonunadək 115 mln. manatlıq güzəştli kreditlərin verilməsinə imkan yaradır».

Ş.Abdullayev onu da qeyd edib ki, ehtiyac olduğu halda SKMF qiymətli kağızlar buraxmaqla da vəsait cəlb etməyə hazırdır.

Xatırladaq ki, SKMF bank-agentlərə kreditləri illik 1%, banklar isə sahibkarlara 7%-dən çox olmamaq şərti ilə ayırır. Sahibkarlara güzəştli kreditlərin verilməsi müvəkkil kredit təşkilatı kimi seçilmiş 35 kommersiya bankı, 1 bank olmayan kredit təşkilatı və 4 kredit ittifaqı vasitəsilə həyata keçirilir. Kreditin minimal məbləği 1 000 manat, maksimal məbləği isə 3 mln. manat təşkil edir.