Sahibkarlıq

Ana səhifə

Sahibkarlıq

Bakıda Azərbaycan-Suriya hökumətlərarası komissiyasının birinci iclası keçirilir

29 iyun 2010 10:57 (UTC +04:00)

«APA-Economics»in məlumatına görə, iclasda iqtisadi, mədəni, elmi-texniki əməkdaşlığa dair məsələlər müzakirə olunur.

İclasın açılışında çıxış edən komissiyanın Azərbaycan tərəfdən həmsədri, kənd təsərrüfatı naziri İsmət Abasov bildirib ki, iclasda ölkələr arasında maraq doğuran bir sıra sahələr üzrə əməkdaşlığın istiqamətləri müzakirə olunacaq. İyunun 30-da isə iclasın yekununa dair protokol imzalanacaq.

Komissiyanın Suriya tərəfdən həmsədri, Suriyanın neft və mineral ehtiyatlar naziri Sufian əl-Alao ölkəsinin Azərbaycanla əməkdaşlığa böyük önəm verdiyini vurğulayıb. Ölkələr arasında 30-dan artıq sənədin imzalandığını deyən suriyalı nazir artıq bu sənədlərdən bəzilərinin təsdiq olunaraq tətbiq edildiyini vurğulayıb.

Suriyalı nazir səfər çərçivəsində Azərbaycan tərəfi ilə gələn ilin ortalarından idxal etmək istədikləri Azərbaycan qazının qiymətini razılaşdıracaqlarını da vurğulayıb.

Hökumətlərarası komissiyanın iclasında qeyd olunub ki, Suriya tərəfi ixrac etmək istədiyi kənd təsərrüfatı məhsullarının siyahısını Azərbaycan tərəfinə təqdim edəcək. Eyni zamanda Azərbaycan sahibkarları ilə Suriya iqtisadiyyatına investisiya yatırılması üçün görüşlərin keçirilməsinə çalışacaqlar.

İclası çərçivəsində tərəflər Azərbaycan və Suriya hökumətləri arasında ticarət və iqtisadi əməkdaşlıq haqqında sazişin layihəsinin hazırlanması və razılaşdırılması istiqamətində işlərin sürətləndirilməsi, kənd təsərrüfatı sahəsində əməkdaşlığın genişləndirilməsi, təcrübə mübadilələrinin təşkili, hər iki ölkənin neft-qaz sektorunda birgə müəssisələrin yaradılması, suriyalı neft-qaz mütəxəssislərinə Azərbaycanda treninqlərin keçirilməsi, elm və təhsil, səhiyyə sahəsində əməkdaşlığın qurulması və əlaqələrin genişləndirilməsi, turizm şirkətləri arasında əlaqələrin qurulması və info-turların təşkili, Bakı-Dəməşq aviareysinin açılması və s. məsələləri müzakirə ediblər.

Qeyd edək ki, Suriya tərəfdən hökumətlərarası komissiyanın üzvləri bu gün Fəxri Xiyabanı və Şəhidlər Xiyabanını ziyarət edib. Səfər çərçivəsində nümayəndə heyətinin Azərbaycanın sənaye və energetika naziri Natiq Əliyev, iqtisadi inkişaf naziri Şahin Mustafayevlə görüşü, həmçinin Heydər Əliyev Fondunun muzeyində olması planlaşdırılır.