Sahibkarlıq

Ana səhifə

Sahibkarlıq

«SABA» şirkətinin istehsal etdiyi 7 ton dondurma məhv edilib

05 iyul 2010 15:26 (UTC +04:00)

Bakı. Nicat Mustafayev - APA-Economics. Azərbaycan İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən «SABA şirkəti» MMC-də aparılan yoxlama zamanı müəssisədə istehsal edilən «Domino», «Lunnıye noçi» və «Ekzotik» adlı dondurmaların üzərində saxlama müddətinin normativ sənədlərlə müəyyən edilmiş müddətdən artıq göstərildiyi, «Eskimo», «Maksima», «Saturn», «Merkuriy», «XXI əsr», «Prestige» adlı və cemli plombir dondurmaların gigiyenik və uyğunluq sertifikatlarının olmadığı aşkar edilib.

Nazirlikdən «APA-Economics»ə verilən məlumata görə, bununla əlaqədar müəssisənin anbarında olan 7,9 ton hazır məhsulun satışının dayandırılması və ticarət şəbəkəsinə göndərilmiş dondurmaların geri yığılması, habelə üzərində saxlama müddəti normativ sənədlərlə müəyyən edilmiş müddətdən artıq göstərilmiş 1 591 kq, gigiyenik və uyğunluq sertifikatları olmayan məhsulların qablaşdırılmasında istifadə edilən 854 kq bükmə materialından istifadənin dayandırılması barədə «SABA şirkəti» MMC-yə icbari göstəriş verilib.

Eyni zamanda müəssisənin anbarında olan hazır məhsullardan nümunə götürülərək laborator müayinəyə göndərilib.

Laborator müayinələr nəticəsində müəssisədə istehsal edilən «Çarli», «Merkuriy», «Domino» adlı dondurmalarda mezofil-aerob və fakültativ-anaerob mikroorqanizimlərin sayının normadan çox, «Ekzotik», «Prestige», «Millenium» adlı və ağ vanilli və şokoladlı plombir dondurmalarda mezofil-aerob və fakültativ-anaerob mikroorqanizimlərin sayının normadan çox və tərkibində bağırsaq çöpləri qrupundan olan bakteriyalar (koliformalar), «Meridian», «Lunnıye noçi», «Saturn», «XXI əsr» adlı dondurmaların tərkibində isə bağırsaq çöpləri qrupundan olan bakteriyalar (koliformalar) olduğu müəyyən edilib.

Bundan başqa, «Merkuriy», «Saturn» və «Prestige» adlı dondurmalarda yağın kütlə payı etiket göstəricisindən az olub.

Təhlükəsizlik göstəriciləri normativ sənədlərin tələblərinə uyğun olmayan 6,6 ton dondurmanın məhv edilməsi, habelə uyğunluq və gigiyenik sertifikatları olmayan 1 ton dondurmanın satışının qadağan olunması barədə Dövlət Xidməti tərəfindən «SABA şirkəti» MMC-yə icbari məcburi göstəriş verilib.