Sahibkarlıq

Ana səhifə

Sahibkarlıq

“Almalı” mağazalar şəbəkəsinin fəaliyyəti bərpa olunur

16 iyul 2010 12:33 (UTC +04:00)

Bakı. Aynur Vəliyeva - APA-Economics. Bu gün Bakıda ADA Şirkətlər Qrupunun mərkəzi ofisində Avropanın tanınmış yatırım şirkəti olan “CRG Capital” şirkətinin icraçı direktoru Parham Pouladdej ilə KİV nümayəndələri ilə görüşü keçirilib.

“APA-Economics”in məlumatına görə, tədbirdə çıxış edən ADA-nın İdarə Heyətinin sədri Rafael Hacıyev bildirib ki, son bir il ərzində şirkətlər qrupuna məxsus olan “Almalı” mağazalar şəbəkəsi böhran keçirib: “Vəziyyətdən çıxmaq üçün şirkət yeni investisiyalar cəlb etmək məqsədilə xarici şirkətlərlə danışıqlar aparıb və bu ilin əvvəlində “CRG Capital” şirkəti ilə danışıqlara başlayıb”.

Öz növbəsində P.Pouladdej qeyd edib ki, bu ilin fevral ayından başlayaraq təmsil etdiyi şirkət “Almalı” şəbəkəsinin mövcud durumu ilə tanış olub: “Artıq “Almalı” mağazalar şəbəkəsinin restrukturizasiya və bərpası ilə bağlı biznes-plan hazırlanıb və tələb olunan investisiyaların həcmi müəyyən edilib”.

P.Pouladdej deyib ki, son beş ayda şirkətin səhmdarları ilə ilkin danışıqlar aparılıb: “Bu gündən etibarən şirkətin kreditorları, səhmdarları və əlaqədar strukturlarla danışıqlara başlanılır və payızın əvvəlinə kimi bu danışıqları uğurla başa çatdırmaq planlaşdırılıb”.

İnvestor eyni zamanda bildirib ki, bu ayın payızında “Almalı” mağazalar şəbəkəsi eyni brend altında fəaliyyətini bərpa edəcək: “Ümumilikdə 20 marketin aşılması nəzərdə tutulub, bunların içində bir neçə hiper-market və bir sıra mini-marketlər olacaq. Lakin mərhələlərlə hər dəfə 5 market açılması nəzərdə tutulur. Bunların fəaliyyətindən gələn vəsaitlər borcların ödənilməsinə və yeni marketlərin açılmasına yönəldiləcək”.

Ümumilikdə mağazalar şəbəkəsinin restrukturizasiya və bərpasına 5-7 mln. manat investisiyanın cəlb edilməsi nəzərdə tutulub. İnvestisiya müqaviləsinin müddəti 5 ildir.

ADA Şirkətlər Qrupunun indiyədək yaranmış borclarına gəlincə, R.Hacıyev qeyd edib ki, “Almalı” mağazalar şəbəkəsinin işçilərinin 3-4 aylıq əmək haqqı üzrə borcu mərhələlərlə qaytarılacaq: “Biz borcun ödənişini investorlarla bərabər həyata keçirəcəyik. Artıq işdən məcburən azad olan işçilərimizi geri çağıracağıq, çünki “Almalı” mağazalar şəbəkəsinin personalı xarici mütəxəssislərin iştirakı ilə xüsusi treninqlər keçib, biz onların hazırlanmasına böyük zəhmət qoymuşuq”.

R.Hacıyevin sözlərinə görə, son üç ildə şirkət tərəfindən banklara 12 mln. manat həcmində faiz ödənilib və bundan sonra da bu istiqamətdə işlər aparılacaq.

Qeyd edək ki, «Almalı» mağazalar şəbəkəsinin operatoru olan «ADA» Şirkətlər Qrupu 2005-ci ildə yaradılıb. Qrupun əsas səhmdarlarından biri Beynəlxalq Maliyyə Korporasiyasıdır (BMK). Layihə ölkənin qeyri-neft sektorunda BMK-nın ən böyük maliyyə layihəsidir. Layihənin məqsədi “Regionların sosial-iqtisadi inkişafı Dövlət Proqramı”na dəstək olmaq, yerli fermerlər üçün böyük həcmli alıcı təbəqəsi formalaşdıraraq onlara stimul vermək, beləliklə, aqrar sənayenin inkişafına nail olmaqdır.