Sahibkarlıq

Ana səhifə

Sahibkarlıq

Bakıda Azərbaycan-Almaniya biznes-forumu keçirilir

19 iyul 2010 09:52 (UTC +04:00)

Bakı. Nicat Mustafayev - APA-Economics. Bakıda Azərbaycan İqtisadi İnkişaf Nazirliyi, Azərbaycanda İxracın və İnvestisiyaların Təşviqi Fondu (Azpromo) və Almaniya-Azərbaycan İqtisadi Birliyinin (DAWF) təşkilatçılığı ilə XI Azərbaycan-Almaniya İqtisadi Forumu keçirilir.

«APA-Economics»in məlumatına görə, tədbirdə çıxış edən Azərbaycanın iqtisadi inkişaf nazirinin müavini Niyazi Səfərov ölkənin iqtisadi inkişafından danışaraq qeyd edib ki, cari ilin ilk yarısında Azərbaycanda ümumi daxili məhsulun artım tempi 3,7% təşkil edib, orta əmək haqqı 5%, neft sektoru 2,4%, sənayenin qeyri-neft sektoru 15,3% artıb, ölkə iqtisadiyyatına 3,8 mlrd. ABŞ dolları məbləğində investisiya yatırılıb və 36 min yeni iş yeri yaradılıb: «Son 17 il ərzində Azərbaycan iqtisadiyyatına 70 mlrd. dollardan artıq investisiya yatırılıb ki, bunun da yarısını xarici sərmayələr təşkil edir».

Azərbaycan və Almaniya arasında mövcud əməkdaşlıqdan danışan N.Səfərov bildirib ki, hazırda Azərbaycanda Almaniya kapitalın ilə 100-ə yaxın şirkət fəaliyyət göstərir: «İki ölkə arasında sənaye, turizm, kənd təsərrüfatı, innovasiya və bu kimi sahələrdə əməkdaşlığın inkişaf etdirilməsi üçün böyük potensial mövcuddur».

Tədbirdə çıxış edən Almaniyanın federal iqtisadiyyat və texnologiya naziri Andreas Neuman qeyd edib ki, Azərbaycanın çox yaxşı coğrafi mövqeyi mövcuddur və Almaniya Azərbaycanla təkcə neft-qaz sahəsi deyil digər sahələrdə də əməkdaşlıq etməyə və mövcud əməkdaşlığı inkişaf etdirməyə hazırdır: «Ötən il Azərbaycandan Almaniyaya 4,2 mln. ton neft ixrac olunub ki, Azərbaycan Almaniyaya neft ixrac edən ölkələr sırasında 6-cı yeri tutub. Biz həmçinin «Nabucco» qaz kəməri layihəsinə də böyük önəm veririk».

Tədbirdə çıxış edən Azərbaycan kənd təsərrüfatının nazirinin müavini Bəhram Əliyev iki ölkə arasında kənd təsərrüfatı sahəsində sıx əməkdaşlıqdan danışıb və mövcud əlaqələrin genişləndirilməsinin vacib olduğunu vurğulayıb: «Ötən il ərzində Almaniyadan Azərbaycana 770 baş cins mal-qara ixrac olunub. Bu ilin sonunadək ölkəyə Almaniya və Avstriyadan daha 615 baş cins damazlıq gətiriləcək».

Qeyd edək ki, tədbirdə neft-qaz, bərpa olunan enerji, maşınqayırma və avadanlıqlar, kənd təsərrüfatı və qida sənayesi texnikası, maliyyə və bank sahəsində fəaliyyət göstərən 50-yə yaxın iş adamı iştirak edir. Tədbir çərçivəsində Almaniya və Azərbaycan iş adamları arasında ikitərəfli görüşlər keçiriləcək.