Sahibkarlıq

Ana səhifə

Sahibkarlıq

Bakıda saxta limonad istehsalçısı aşkarlanıb

21 iyul 2010 15:50 (UTC +04:00)

Bakı. Nicat Mustafayev - APA-Economics. Azərbaycan İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən keçirilmiş növbəti monitorinqlər zamanı 0,5 litrlik şüşə butulkada qablaşdırılmış «Golden Graal» adlı limonadların etiketində yararlılıq müddətinin normativ sənədlərdə müəyyən olunmuş müddətdən artıq göstərildiyi aşkar edilib.

Nazirlikdən «APA-Economics»ə verilən məlumata görə, bununla əlaqədar, «Golden Graal» limonadlarının istehsal edildiyi Abşeron rayonu, Məhəmmədli qəsəbəsində Rauf Novruzova məxsus istehsalat sahəsində sərinləşdirici içkilərin istehsalı və satışının qanunauyğunluğunun yoxlanılmasına başlanılıb.

Yoxlama zamanı «Golden Graal» əmtəə nişanından qanunsuz istifadə edilərək eyni əmtəə nişanlı saxta düşes, tərxun, qızıl gül limonadları, şaftalı və albalı şirələrinin və qazlı suların istehsal edildiyi müəyyən olunub.

Bundan başqa, düşes, tərxun, qızıl gül limonadlarının, şaftalı və albalı şirələrinin yararlılıq müddətinin normativ sənədlərdə müəyyən edilmiş müddətdən artıq göstərildiyi, qazlı suların uyğunluq və gigiyenik sertifikatları olmadan istehsal edildiyi aşkarlanıb.

Eyni zamanda müəssisədə antisanitariya şəraiti hökm sürür və yeyinti məhsullarının istehsalı üçün müvafiq şəraitin olmaması müəyyən edilib. Müəssisədə istehsal olunan hazır məhsullardan nümunələr götürülərək laborator müayinəyə göndərilib.