Sahibkarlıq

Ana səhifə

Sahibkarlıq

Bakıda kommersiya məqsədilə istifadə edilən əmlakın orta satış qiyməti azalıb

23 iyul 2010 13:17 (UTC +04:00)

Bakı. Nicat Mustafayev - APA-Economics. Bu ilin iyun ayı ərzində Bakı şəhəri üzrə kommersiya məqsədilə istifadə edilən əmlakın orta satış qiymətində 0,3%, icarə qiymətlərində isə 0,2% qiymət azalması qeydə alınıb.

«Əmlak Bazarı İştirakçıları» İctimai Birliyindən «APA-Economics»ə verilən məlumata görə, iyunda bazara təklif olunan qeyri-yaşayış sahələrinin sayı 3% azalıb. Bazarda qiymətlərin stabilləşməsinə baxmayaraq, tələbin aşağı olması ekspozisiya müddətinin artımına təsir göstərməyib. Ekspozisiya müddətinin artımı müvafiq olaraq əmlakın bu növü üzrə risk dərəcəsini də artıb.

Ötən illə müqayisədə Bakı şəhəri üzrə qiymət indeksində azalma 3,2%, ötən ayla müqayisədə isə 0,4% təşkil edib. Bununla yanaşı, iyun ayı ərzində təklif 6,5% azalıb. Təklifin azalmasına mövsümlə əlaqədar bazarda dərinləşən passivlik səbəb olub.

Hesabat ayında qeyri-yaşayış sahələri və icarə bazarlarında qiymətlərin nisbi azalması müşahidə olunub. Qeyri-yaşayış sahələrinin satış qiymətində 0,4%, icarə qiymətində isə 0,3% qiymət azalması qeydə alınıb. Bakı şəhəri üzrə 1 kv. m qeyri-yaşayış sahəsinin orta qiyməti (təklif üzrə) martda qeydə alınan 2 958 ABŞ dollarından 2 950 dollara enib. Aparılan araşdırmalara əsasən qiymət azalması ötən rüblə müqayisədə 1% təşkil edib. Qeyri-yaşayış sahələrinin qiymətləri ötən ilin müvafiq dövründə qeydə alınmış nəticədən 2% aşağı olaraq qalır.

Ay ərzində qeyri-yaşayış sahələri bazarında heç bir rayonda orta qiymət artımı baş verməyib. Ən çox qiymət azalması isə Binəqədi rayonunda (-0,8%) müşahidə olunub.

İyunda bazarda qeyri-yaşayış sahələrinin 1 kv.m-nin orta qiymətindən (2 950 dollar) aşağı olan obyektlər ümumi portfeldə 53,4% paya malik olub.