Sahibkarlıq

Ana səhifə

Sahibkarlıq

Azərbaycan prezidenti “Gilan” konserv zavodunda yaradılan yeni istehsal sahələri ilə tanış olub, “Qafqaz Riverside” hotelinin açılışında iştirak edib

29 iyul 2010 16:26 (UTC +04:00)

APA-nın məlumatına görə, dövlət başçısına məlumat verilib ki, 12 hektar ərazidə yerləşən zavodun istehsal gücünə və texnoloji avadanlığına görə Qafqazda analoqu yoxdur. Zavodda “Tetra Pak” xətti istismara verilib, xaricdən gətirilən avadanlıq quraşdırılıb. Müəssisənin iş prinsipi xammal qəbulundan başlayaraq hazır məhsulun qablaşdırılmasına qədər bütün prosesləri əhatə edir. 2007-ci ilin martında prezident İ. Əliyevin iştirakı ilə açılan bu zavodda təxminən 100-ə qədər müxtəlif növdə qablaşdırılmış məhsul istehsal olunur. Məhsullar “Jalə”, “Bağdan”, “Aycan”, “Zolotoy sad” adlı təbii meyvə şirələri, müxtəlif tamlara malik “İce tea-Jalə” soyuq çayları, həmçinin meyvə dilimlərindən ibarət konservlərdir.

Dövlət başçısı müəssisədə istehsal olunan məhsulların nümunələrinə baxıb. Bildirilib ki, zavod ildə 700 min ton meyvə emal etmək, 210 min ton meyvə şirəsi hazırlamaq gücünə malikdir. Hazır məhsulu keyfiyyətlə saxlamaq üçün Azərbaycanda tam fərqli və regionda analoqu olmayan anbar inşa edilib. Xüsusi temperatur və gigiyenik şəraitin yüksək səviyyədə qorunduğu anbar məhsulların təravətli qalmasına zəmin yaradır. Zavodun məhsulları 30-dan çox ölkəyə ixrac edilir. Prezident İ. Əliyev istehsal prosesini izləyib, meyvə qəbulu bölməsi və şüşə qablara məhsul dolduran xəttə baxıb.

Sonra dövlət başçısı zavodda aparılan yenidənqurma və genişləndirmə işlərini əks etdirən maketlə tanış olub.

Prezident İ. Əliyev “Qafqaz Riverside” hotelinin açılışında da iştirak edib. Dövlət başçısı açılışı bildirən lenti kəsib, turizm obyekti ilə yaxından tanış olub. Məlumat verilib ki, 2008-ci ilin avqustunda inşasına başlanılan beşulduzlu hotel “Gilan Turizm” şirkətinə daxil olan ən böyük layihələrdən biridir.

Bildirilib ki, 16 hektar ərazidə yerləşən və sahəsi 2 min 250 kvadratmetr olan hotel 7 mərtəbəli əsas korpusdan və kotteclərdən ibarətdir. Avanqard və modern arxitektura üslublarının sintezi əsasında inşa edilən binanın interyerinin tərtibatında xaricdə hazırlanmış mebel və aksessuarlardan istifadə olunub. Burada 96-sı “Superior”, 12-si “Junior suit”, 6-sı “Deluks suit”, 4-ü “Dubleks suit”, 5-i isə “Kral suit” olmaqla, 123 nömrə vardır. Nömrələrdə qonaqların istirahətinin yüksək səviyyədə təmin edilməsi üçün hər cür şərait yaradılıb. Bütün otaqlar rəqəmli seyf, mini-bar, havalandırma sistemləri, peyk televiziya antenası, beynəlxalq telefon xətti, kabelsiz internetlə təchiz edilib.

Hotelin ərazisində yüksək standartlara cavab verən 38 kottec inşa olunub. Ailəvi istirahət üçün ideal şəraitə malik olan kotteclərdə amerikan mətbəxi qonaqların ixtiyarına verilib. Hotelin qonaqları gün ərzində otaq xidməti, faks-kseroks, örtülü avtodayanacaq, camaşırxana, ticarət mərkəzi, avtobus, tibbi yardım xidmətlərindən də faydalana bilərlər. Burada 300 nəfərlik yeməkxana və sifarişlə işləyən 150 nəfərlik restoran fəaliyyət göstərir.

Hoteldə zəngin menyu təqdim edən bir neçə bar da var. Açıq havada istirahət etmək istəyənlər üçün 70 nəfərlik bağça yaradılıb. Bundan əlavə, konfrans, iclas, seminar, təqdimat mərasimlərinin keçirilməsi üçün burada 25 nəfərlik iki və 150 nəfərlik bir iclas zalı var. Hoteldə sağlamlıq mərkəzi, sauna, türk hamamı, açıq və örtülü hovuz, idman zalı da fəaliyyət göstərir. Uşaqların əylənməsi üçün oyun meydançası da inşa olunub.

Əliyev_Qəbələ