Sahibkarlıq

Ana səhifə

Sahibkarlıq

Balakəndə sahibkarlığın inkişafına dövlət dəstəyi mövzusunda tədbir keçirilib

06 avqust 2010 12:59 (UTC +04:00)

Bakı. Rəşad Süleymanov – APA-Economics. Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) bu gün Balakən rayonunda «Regionlarda sahibkarlığın inkişafına dövlət dəstəyi» mövzusunda növbəti tədbir keçirib. Bu barədə «APA-Economics»ə İqtisadi İnkişaf Nazirliyinin mətbuat xidmətindən məlumat verilib.

Şəki-Zaqatala iqtisadi rayonunda fəaliyyət göstərən 140-a yaxın sahibkarın iştirak etdiyi tədbirin keçirilməsində əsas məqsəd Regionların sosial-iqtisadi inkişafı Dövlət Proqramına (2009-2013-cü illər) uyğun olaraq sahibkarlığın inkişafına dövlət dəstəyinin, sahibkarlıq subyektlərinin investisiya layihələrinin güzəştli şərtlərlə kreditləşdirilməsinin və onların maarifləndirilməsinin davam etdirilməsidir.

İştirakçılar əvvəlcə SKMF-in güzəştli kreditləri hesabına Şəki rayonunda «Karat Holdinq» MMC-nin inşa etdirdiyi 10 min ton tutumu olan taxıl anbarı kompleksində aparılan son tamamlama işləri, «Kapitol» firmasının otel kompleksində həyata keçirilən tikinti işləri və Qax rayonunda «Qax-Konserv» ASC-də istehsal prosesi ilə tanış olublar.

Tədbirdə SKMF-in fəaliyyətinə dair təqdimat olub. Fondun icraçı direktoru Şirzad Abdullayev bildirib ki, Fond müasir standartlara cavab verən kiçik və ya orta həcmli meyvə emalı müəssisələrinin yaradılması və yaxud müasir texnologiyaların tətbiqi ilə yenidən qurulması üzrə investisiya layihələrinin maliyyələşdirilməsi məqsədilə sahibkarlardan təkliflərin qəbulunu davam etdirir. Meyvəçiliyin Şəki-Zaqatala iqtisadi rayonu üçün ənənəvi sahələrdən olduğunu vurğulayan Ş.Abdullayev sahibkarları bu sahədə fəallığa dəvət edib.

Tədbir çərçivəsində SKMF-in güzəştli kreditlərinin verilməsi mexanizmi ilə bağlı sahibkarlar üçün treninq keçirilib. Daha sonra müvəkkil kredit təşkilatları vasitəsilə Balakən və ətraf rayonlarda fəaliyyət göstərən 34 sahibkarlıq subyektinə 480 min manatdan çox güzəştli kredit verilib. Bu kreditlər hesabına kənd təsərrüfatı məhsullarının və mineral suların istehsalı sahələrində 65 yeni iş yerinin yaradılması nəzərdə tutulur.