Sahibkarlıq

Ana səhifə

Sahibkarlıq

Azərbaycanın ticarət şəbəkəsindən yanvar-iyulda 200 ton məhsul satışdan çıxarılaraq məhv edilib

12 avqust 2010 12:14 (UTC +04:00)

Bakı. Rəşad Süleymanov – APA-Economics. Azərbaycan İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən 2010-cu ilin yanvar-iyul aylarında yoxlamalar aparılmış 1 122 ticarət və ictimai-iaşə obyektindən 966-da qanun pozuntusu aşkar edilib. Bu barədə «APA-Economics»ə İqtisadi İnkişaf Nazirliyinin mətbuat xidmətindən məlumat verilib.

Yoxlamalar zamanı mənşəyi məlum olmayan, saxlama müddəti ötmüş və normativ sənədlərin tələblərinə cavab verməyən 824,1 ton müxtəlif ərzaq malları, o cümlədən ət və ət məhsulları, şəkər, bal və qənnadı məhsulları, süd və süd məhsulları, balıq məhsulları, konservləşdirilmiş məhsullar, sərinləşdirici içkilər və s. satışdan çıxarılıb. Bu məhsulların 182,1 tonu məhv edilib, 30,3 tonu təkrar emala göndərilib, 529,7 tonu normativ sənədlərin tələblərinə uyğun etiketləndikdən sonra satışa qaytarılıb, 82 tonu ilə bağlı isə araşdırmalar davam etdirilir.

Hesabat dövründə saxlama müddəti ötmüş, normativ sənədlərin tələblərinə cavab verməyən və mənşəyi məlum olmayan 362,6 ton qeyri-ərzaq malları, o cümlədən yuyucu və təmizləyicilər, kosmetik vasitələr, sement və s. satışdan çıxarılıb. Bu malların 14,3 tonu məhv edilib, 220,4 tonu müvafiq qaydada etiketləndikdən sonra satışa qaytarılıb, 127,9 tonu ilə bağlı isə araşdırma aparılır.

Yanvar-iyul ayları ərzində Dövlət Xidməti tərəfindən antiinhisar qanunvericiliyinin tələblərinin pozulması əlamətləri üzrə 32 təsərrüfat subyekti barəsində iş qaldırılıb. Bunlardan 24-nə yol verdikləri qanun pozuntularına görə 897,3 min manat maliyyə sanksiyası tətbiq olunub.

Bundan başqa, İnzibati Xətalar Məcəlləsinə uyğun olaraq, qanun pozuntusuna yol vermiş təsərrüfat subyektləri barəsində 946 qərar qəbul edilib. Qərarlar əsasında inzibati xətaya yol vermiş şəxslərə 1423,9 min manat məbləğində cərimə tətbiq olunub. Hesabat dövründə Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin laboratoriyalarında ərzaq mallarının keyfiyyət və təhlükəsizlik göstəricilərinin qiymətləndirilməsi ilə bağlı 709 müayinə aparılıb, 257 halda malların keyfiyyət və təhlükəsizlik göstəricilərinin normativ sənədlərin tələblərinə uyğun olmadığı müəyyən edilərək, müvafiq tədbirlər görülüb. Bu dövrdə Azərbaycandan ixrac olunan mallara 5 712 (o cümlədən Ümumi Üstünlüklər Sisteminə (GSP+) daxil olan ölkələrə ixrac olunan mallara 412) mənşə sertifikatı verilib.