Sahibkarlıq

Ana səhifə

Sahibkarlıq

Gədəbəydə «Regionlarda sahibkarlığın inkişafına dövlət dəstəyi» mövzusunda tədbir keçirilib

20 avqust 2010 13:15 (UTC +04:00)

Bakı. Nicat Mustafayev – APA-Economics. Bu gün Gədəbəy rayonunda Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) «Regionlarda sahibkarlığın inkişafına dövlət dəstəyi» mövzusunda tədbir keçirib. Nazirlikdən «APA-Economics»ə verilən məlumata görə, tədbirdə Gəncə-Qazax iqtisadi rayonunda fəaliyyət göstərən 200-ə yaxın sahibkar iştirak edib.

Tədbirdə çıxış edən İqtisadi İnkişaf Nazirliyi regionların inkişafı və dövlət proqramları şöbəsinin müdiri Sahib Məmmədov, sahibkarlığın inkişafı siyasəti şöbəsinin müdir müavini Elçin İbrahimov, Bakı Biznes Tədris Mərkəzinin direktor müavini Rahim Mürsəlov hazırda ölkədə sahibkarlığın daha da inkişaf etdirilməsi üçün əlverişli şəraitin yaradıldığını bildirib, regionların inkişafında dövlət proqramlarının rolu və regionların gələcək inkişaf perspektivləri haqqında tədbir iştirakçılarına məlumat veriblər.

SKMF-in icraçı direktoru Şirzad Abdullayev isə öz növbəsində Fondun fəaliyyətinə dair təqdimatla çıxış edərək «Azərbaycan regionlarının 2009-2013-cü illərdə sosial-iqtisadi inkişafı Dövlət Proqramı»na uyğun olaraq, müasir standartlara cavab verən kiçik və ya orta həcmli meyvə emalı (üzüm, ərik, şaftalı, gavalı, albalı, gilas, xurma, alma, armud, tut və s. meyvələrin qurudulması və ya konservləşdirilməsi, o cümlədən mürəbbə, marinad, cem, jele və s.) müəssisələrinin yaradılması və ya müasir texnologiyaların tətbiqi ilə yenidən qurulması üzrə investisiya layihələrinin maliyyələşdirilməsi məqsədilə sahibkarlardan təkliflərin qəbulunun davam etdirildiyini bildirib, sahibkarları bu sahədə fəallığa dəvət edib.

Tədbir çərçivəsində sahibkarlar üçün həmçinin treninq keçirilib. Treninqdə sahibkarlara biznes ideyalarının formalaşdırılması, investisiya layihələrinin hazırlanması və təqdim edilməsi qaydaları barədə məlumat verilib, sahibkarlara güzəştli kreditlərin əldə olunması proseduru, sahibkarlıq subyektləri tərəfindən təqdim edilən investisiya layihələrinin tərtib edilməsinə dair minimal tələblər və Fondla əməkdaşlıq edən müvəkkil kredit təşkilatları barədə məlumatları əks etdirən broşürlər, investisiya layihələrinin (biznes-planların) hazırlanmasına dair tövsiyə xarakterli materiallar təqdim edilib.

Tədbir çərçivəsində müvəkkil kredit təşkilatları vasitəsilə Gədəbəy və ətraf rayonlarda fəaliyyət göstərən 33 sahibkarlıq subyektinə 400 min manat məbləğində güzəştli kreditlər verilib. Bu kreditlər hesabına 76 yeni iş yerinin yaradılması nəzərdə tutulur.