Sahibkarlıq

Sahibkarlıq

Azad İstehlakçılar Birliyi saxta duz məhsullarının satışı ilə bağlı keçirdiyi monitorinqin nəticələrini açıqlayıb

24 avqust 2010 10:26 (UTC +04:00)

Bakı. Elnur Hüseynquluyev - APA-Economics. Bu gün Azad İstehlakçılar Birliyi (AİB) satışda yodlaşdırılmamış saxta duz məhsullarının olması ilə bağlı respublikanın bir sıra rayonları üzrə keçirdiyi monitorinqin nəticələrini açıqlayıb.

«APA-Economics»in məlumatına görə, AİB sədri Eyyub Hüseynov keçirdiyi mətbuat konfransında bildirib ki, bir müddət əvvəl rəhbərlik etdiyi qurumun əməkdaşları cənub bölgəsində olub, təbliğat işləri apararaq saxta, təmizlənməmiş və yodsuz duzların satışdan çıxarılmasına nail olub: “Cənub bölgəsində ən pis vəziyyət Astara rayonunda müşahidə edilib. Əfsuslar olsun ki, qanunu pozan bu insanlara heç kim söz demir”.

E.Hüseynov bildirib ki, hazırda əmtəə bazarında kütləvi satılan 2 kq-lıq sellofanda qablaşdırılmış Naxçıvan Filiz İdarəsinin istehsal etdiyi, tərkibində yod olmayan duzlar, həmçinin «Kulina» mal nişanı ilə Moskvadan idxal olunmuş yodsuz duzlar, cənub rayonlarında 50 kq-lıq kisələrdə qablaşdırılmış, milli dildə etiketində heç bir məlumat olmayan İran istehsalı olan duzlar bütün cəmiyyəti və dövlət orqanlarını narahat etməlidir.

Onun sözlərinə görə, yod çatışmazlığı xəstəliyinin kökünün kəsilməsinə maneçilik törədən digər əhəmiyyətli amil Masazır, Qaradağ, və Salyan duz göllərindən kütləvi şəkildə duzun toplanması, bütün polis xidmət sahələrinin, bələdiyyə və səhiyyə qurumlarının gözü qarşısında respublika ərazisində satılmasıdır.