Sahibkarlıq

Sahibkarlıq

Azərbaycan Avropa İttifaqı ölkələrinə balıq məhsullarının ixracı üçün ilin sonunadək xüsusi icazə alacaq - FOTO

Azərbaycan Avropa İttifaqı ölkələrinə balıq məhsullarının ixracı üçün ilin sonunadək xüsusi icazə alacaq - <font color=red>FOTO</font>

02 sentyabr 2010 08:59 (UTC +04:00)

Bakı. Nicat Mustafayev – APA-Economics. Bu gün Bakıda Azərbaycan İqstiadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətində Avropa Komissiyasının dəstəyi, Hollandiya Krallığının Ərzaq və İstehlak Mallarının Təhlükəsizliyi üzrə Səlahiyyətli Orqanı və Latviya Ərzaq və Baytarlıq Xidməti tərəfindən «Azərbaycanın ərzaq keyfiyyəti və təhlükəsizliyinin təminatı və Azərbaycan mənşəli balıq məhsullarının sertifikatlaşdırılmasının hüquqi və texniki təkmilləşdirilməsinə dəstək» tvininq layihəsinin yekunlarına dair konfrans keçirilib.

«APA-Economics»in məlumatına görə, tədbirdə çıxış edən Azərbaycanın iqtisadi inkişaf nazirinin müavini Sevinc Həsənova qeyd edib ki, 1999-cu ildə Azərbaycanla Avropa İttifaqı arasında əməkdaşlıq sazişi imzalanandan sonra ölkədə bir sıra mühüm layihələr həyata keçirilib: «Azərbaycanda həyata keçirilən tvininq layihəsi də bunlardan biridir ki, Avropa Qonşuluq Siyasətinin Faəliyyət Planı çərçivəsində həyata keçirilmiş 225 tvininq layihəsi arasında ölkədə icra olunan və 2004-2010-cu illəri əhatə edən bu layihə ən uğurlu 4 layihədən biri seçilib. Belə ki, bu barədə məlumat Avropa Komissiyasının bu yaxınlarda Tvininq, TAIEX və Sigma layihələri ilə bağlı 2009-cu ilin yekunlarına dair açıqladığı hesabatında əksini tapıb».

Tvininq layihəsinin Azərbaycanın Avropa İttifaqına inteqrasiyası prosesində əhəmiyyətindən danışan nazir müavini onu da qeyd edib ki, layihənin həyata keçirilməsi Azərbaycan mənşəli balıq və digər dəniz məhsullarının Avropa İttifaqına ixracını təmin etmək üçün mövcud qanunvericilik bazasının təkmilləşdirilməsi, yerli mütəxəssislərin peşakarlığının artırılması, Dövlət Xidmətinin laboratoriyalarının beynəlxalq standartların tələblərinə uyğunlaşdırılması, məhsulların keyfiyyət və təhlükəsizliyinə daha effektiv nəzarətin icrası sahəsində mühüm rol oynayıb.

S.Həsənova layihə çərçivəsində əldə olunmuş təcrübədən digər yeyinti məhsullarının Avropa bazarlarına ixracın artırılması məqsədilə istifadə olunacağını, Avropa Komissiyasının müvafiq qurumları ilə əməkdaşlığın genişləndirilməsi istiqamətində səylərin bundan sonra da davam etdiriləcəyini bildirib.

Tədbirdə çıxış edən Antiinhisar Siyasəti və İstehlakçıların Hüquqlarının Müdafiəsi Dövlət Xidmətin rəisi Zahid İsayev qeyd edib ki, tvininq layihəsi çərçivəsində Dövlət Xidmətinin müvafiq sahədə çalışan əməkdaşları və laboratoriya mütəxəssisləri üçün ümumilikdə 35 təlim kursu keçirilib, Hollandiya və Latviyanın müvafiq qurumlarında təcrübə keçmək üçün 3 təlim səfəri təşkil edilib, balıq məhsullarının keyfiyyətinə və təhlükəsizliyinə nəzarətin həyata keçirilməsi və sertifikatlaşdırılması ilə bağlı 10-dan artıq normativ-hüquqi sənəd hazırlanıb, eyni zamanada Avropa Komissiyasının qərarı ilə Azərbaycan bu ilin yanvarın 1-dən balıq kürüsünün Avropa İttifaqına ixracına icazə verilən üçüncü ölkələr sırasına daxil edilib: «Hazırda digər növ balıq məhsullarının Avropa İttifaqına ixracı üçün icazənin alınması istiqamətində işlər davam etdirilir ki, cari ilin sonunadək icazələr alınacaq».

Qeyd edək ki, tədbirdə həmçinin Avropa İttifaqının Nümayəndəliyi, Hollandiya Ərzaq və İstehlak Mallarının Təhlükəsizliyi üzrə Səlahiyyətli Orqan, Latviya Ərzaq və Baytarlıq Xidmətinin rəhbərləri və digər nümayəndələri çıxış ediblər.