Sahibkarlıq

Ana səhifə

Sahibkarlıq

Azərbaycanda daha bir keyfiyyətsiz duz istehsalçısı aşkarlanıb

03 sentyabr 2010 12:00 (UTC +04:00)

Bakı. Nicat Mustafayev – APA-Economics. Azərbaycanda keyfiyyətsiz duz istehsalı ilə məşğul olan daha bir müəssisə aşkarlanıb.

İqtisadi İnkişaf Nazirliyindən «APA-Economics»ə verilən məlumata görə, Nazirlik yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən istehlak bazarında satışda olan duzların laborator müayinəsi zamanı «Hikmət» MMC-nin istehsal etdiyi yodlaşdırılmış xörək duzunun tərkibində yodun miqdarının normadan və etiket göstəricisindən az olduğu müəyyən edilib.

Bununla əlaqədar, Abşeron rayonu, Binəqədi-Novxanı yolu, 7-ci km ünvanında yerləşən «Hikmət» MMC-də duz istehsalı və satışının qanunauyğunluğu ilə bağlı yoxlamaya başlanılıb.

Yoxlama zamanı müəssisənin xörək duzu istehsalı üçün uyğunluq sertifikatının olmadığı, xörək duzu istehsalında mənşəyi bəlli olmayan xammaldan istifadə edildiyi, istehsal edilən məhsulun üzərində saxlama müddətinin normativ sənədlərlə müəyyən edilmiş müddətdən artıq göstərildiyi, məhsulun qablaşdırılmasında uyğunluq və gigiyenik sertifikatları olmayan bükmə materiallarından istifadə olunduğu aşkar edilib.

Bundan başqa, müəssisə tərəfindən Rusiya və Belarusdan idxal edilmiş 47,8 ton xörək duzunun üzərində Azərbaycan dilində markalanmanın olmadığı müəyyən edilib.

Aşkar edilmiş qanun pozuntuları ilə əlaqədar müəssisə tərəfindən istehsal edilmiş 13,9 ton xörək duzunun satışının, mənşəyi bəlli olmayan 190 ton xammaldan və uyğunluq və gigiyenik sertifikatı olmayan bükmə materiallarından istifadənin qadağan edilməsi, duz istehsalı və satışının dayandırılması, həmçinin müəssisə tərəfindən istehsal edilmiş duzların ticarət şəbəkəsindən yığılması barədə «Hikmət» MMC-yə icrası məcburi göstəriş verilib.

Eyni zamanda, müəssisənin anbarındakı idxal olunmuş xörək duzlarının satışı dayandırılıb və nümunələr götürülərək laborator müayinəyə göndərilib.