Sahibkarlıq

Ana səhifə

Sahibkarlıq

Bir qrup jurnalist Xaçmazda yerləşən 3 saylı Ərazi Vergilər İdarəsinin vergi ödəyicilərinə xidmət üzrə kompüter terminalında olub

04 sentyabr 2010 12:11 (UTC +04:00)

Xaçmaz. Elnur Hüseynquluyev-APA. Bu gün Azərbaycan Vergilər Nazirliyinin təşkilatçılığı ilə bir qrup jurnalist nazirliyinin Xaçmazda yerləşən 3 saylı Ərazi Vergilər İdarəsinin vergi ödəyicilərinə xidmət üzrə kompüter terminalında olub. APA-nın məlumatına görə, jurnalistlər terminalin göstərdiyi xidmətlərlə yaxından tanış olublar.
Tədbirdə çıxış edən Azərbaycan Sahibkarlar Konfederasiyasının (ASK) Xaçmaz kompüter terminalı üzrə mütəxəssisi Qazəhməd Şahbazov bildirib ki, terminal 2008-ci ilin may ayından fəaliyyət göstərir. Terminalın əsas məqsədi vergi ödəyicilərinin vergi ödənişlərinin könüllü şəkildə həyata keçirməsinə, həmçinin onların hüquqlarının müdafiəsinə, vergi bəyannamələrinin düzgün tərtib edilməsi, bəyannamələrin elektron formada vergi orqanlarına göndərilməsinə yardımçı olmaqdır: “Terminalda vergi borcları haqqında sahibkarlara məlumatlar verilir. Bundan başqa vergi ödəyicilərinin şikayətləri ilə bağlı arayışlar və başqa sənədlər hazırlanır. Vergi ödəyicilərinə dəstək oluruq. Terminalda vergi ödəyiciləri üçün seminarlar da təşkil edilir”.

Q. Şahbazov həmçinin vurğulayıb ki, bu günədək terminala gündə 15-20 nəfər olmaqla, ümumilikdə 800-dən çox vergi ödəyicisi müraciət edib.