Sahibkarlıq

Ana səhifə

Sahibkarlıq

«Iteca Caspian» şirkəti yeni mövsümdə 12 sərgi layihəsi həyata keçirəcək

06 sentyabr 2010 13:40 (UTC +04:00)

«Iteca Caspian»dan «APA-Economics»ə verilən məlumata görə, ümumiyyətlə cari ilin sonunadək 12 mövzunu əhatə edən sərgi layihələri həyata keçiriləcək. Mövsümü regional sərgilər açacaq ki, sentyabrın 21-23-də Gəncədə «Gəncənin infrastrukturu» adlı III Azərbaycan Regional Sərgisi keçiriləcək. Tədbirdə əsas diqqət kənd təsərrüfatı sektoru, qida sənayesi, inşaat və bank sahələrinin məhsul və xidmətlərinə yönəldiləcək.

Sentyabrın 22-24-də isə Bakıda Azərbaycan Beynəlxalq Səhiyyə Sərgisi (BIHE) keçiriləcək. Sərgidə 15 ölkəni təmsil edən 100-dən artıq şirkətin iştirakı gözlənilir. BIHE sərgisi ilə yanaşı stomatologiya avadanlıqları, tibbi istehlak materialları və bir çox digər məhsulları təqdim edən V Yubiley Azərbaycan Beynəlxalq Stomatologiya Sərgisi də təşkil olunacaq. Bundan əlavə, Azərbaycan Stomatoloji Assosiasiyanın dəstəyi ilə stomatologiya sərgisi çərçivəsində «Dünya nailiyyətləri fonunda stomatologiyanın aktual problemləri» adlı XVI Beynəlxalq Elmi-Praktiki Konfrans da keçiriləcək.

Həmin tarixlərdə Bakıda IV Azərbaycan Beynəlxalq Gözəllik və Estetik Təbabət Sərgisi də («Beauty Azerbaijan») təşkil olunacaq.

Sərgi mövsümünü oktyabırn 7-9-da keçiriləcək IV Azərbaycan Beynəlxalq Təhsil və Karyera Sərgisi davam etdirəcək.

Oktyabırn 20-23-də isə Xəzər və Qafqaz regionlarında ən iri beynəlxalq inşaat sərgisi olan «BakuBuild» keçiriləcək. Tədbirdə iştirak edəcəyi gözlənilən 15 ölkədən 250 şirkət kompleksin iki pavilyonunu, eləcə də açıq meydançasını tutacaq. İlk dəfə olaraq, «BakuBuild» sərgisi ilə yanaşı, «Aqua-Term Baku» - Beynəlxalq «İstilik, ventilyasiya, kondisiyalaşdırma, su təchizatı, santexnika və ətraf mühitin mühafizəsi texnologiyaları» sərgisi də keçiriləcək. İnşaat sərgisi ilə eyni meydançada «CaspianMebelExpo» VIII Beynəlxalq Mebel, İnteryer və Dizayn Sərgisi də yer alacaq.

İnformasiya və kommunikasiya texnologiyaları sahəsinin ən vacib hadisələrindən biri olan «BakuTel» XVI Azərbaycan Beynəlxalq Telekommunikasiya və İnformasiya Texnologiyaları Sərgisi isə noyabrın 23-26-da keçiriləcək. Bu il «BakuTel»də Koreyanın, eləcə də ilk dəfə olaraq Belarus, Litva və Polşa kimi ölkələrin milli stendlərinin iştirakı planlaşdırılır. Bu sərgiyə paralel olaraq, III Xəzər Beynəlxalq «Mühafizə, Təhlükəsizlik və Xilasetmə Vasitələri» Sərgisi («CIPS») də təşkil olunacaq ki, bu tədbir noyabrın 24-26-da keçiriləcək.

Qeyd edək ki, bütün sərgilər «Bakı Ekspo Mərkəzi» sərgi kompleksində keçiriləcək.