Sahibkarlıq

Sahibkarlıq

Azərbaycan «Borjomi» sularının idxalını artırır

08 sentyabr 2010 10:59 (UTC +04:00)

Bakı. Nicat Mustafayev – APA-Economics. Bu gün Bakıda Gürcüstanın «Borjomi» ticarət nişanının 120 illiyinə həsr olunmuş tədbir keçirilib.

«APA-Economics»in məlumatına görə, tədbirdə çıxış edən «IDS Borjomi Georgia» şirkətinin baş direktoru Zaza Kikvadze «Borjomi» mineral suyunun tarixindən ətraflı məlumat verib və qeyd edib ki, hazırda bu su dünyanın 30 ölkəsində satılır: «Bizim əsas partnyorlarımız Ukrayna, Qazaxıstan, Azərbaycan və Baltikyanı ölkələrdir. Azərbaycan «Borjomi»nin satış həcminə görə Ukrayna və Qazaxıstandan sonra üçüncü yeri tutur».

«Bojomi»nin istehsal həcmindən danışan Z.Kikvadze bildirib ki, SSRİ dövründə müəssisə ildə 400 mln. şərti butulka həcmində məhsul istehsal edirdi. Lakin sonradan (1995-ci ildə) istehsal həcmi kəskin azalaraq 50 mln. butulka səviyyəsinə düşüb ki, buna zavodun borcu, texnologiyanın müasir standartlara cavab verməməsi kimi amillər səbəb olub: «Buna baxmayaraq, biz xarici investorlar cəlb etdik, müəssisənin borclarını ödədik, yeni avadanlıqlar aldıq və hazırda «Borjomi»nin illik istehsal gücü ildə 100 mln. litr təşkil edir və bu, son 15 ilin ən yaxşı göstəricisidir. Əgər ötən il biz 115 mln. butulka «Borjomi» istehsal etmişdiksə, bu gün üçün istehsalın həcmi 140 mln. butulka təşkil edir».

Azərbaycanda «Borjomi» mineral sularının rəsmi distribütoru olan «ANTEKS» şirkətinin rəhbəri İlkin Piriyev isə öz növbəsində ölkədəki satış həcmlərindən məlumat verərək bildirib ki, ötən il Azərbaycana 6 mln. ədəd butulka «Borjomi» gətirilib: «Cari il ərzində isə Azərbaycana «Borjomi» sularının idxalı 15% artaraq 6,9 mln. butulkaya çatacağı proqnozlaşdırılır».

Qeyd edək ki, Gürcüstanın Borjomi şəhərindən Bakıya «Borjomi» suları dəmir yolu vasitəsilə (750-800 km) gətirilir.