Sahibkarlıq

Sahibkarlıq

Cəlilabadda «İstehlakçı hüquqlarının qorunmasında sahibkarların vəzifələri» mövzusunda konfrans keçirilib

17 sentyabr 2010 13:23 (UTC +04:00)

Bakı. Nicat Mustafayev – APA-Economics. Bu gün Azərbaycan İqtisadi İnkişaf Nazirliyinin təşkilatçılığı ilə Cəlilabad rayonunda «İstehlakçı hüquqlarının qorunmasında sahibkarların vəzifələri» mövzusunda konfrans keçirilib.

Nazirlikdən «APA-Economics»ə verilən məlumata görə, tədbirdə dövlət qurumları və ictimai təşkilatların nümayəndələri, həmçinin Lənkəran iqtisadi rayonunda fəaliyyət göstərən 200-dən çox sahibkar iştirak edib.

Konfransda çıxış edən İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin rəisi Zahid İsayev bildirib ki, hazırda ölkə iqtisadiyyatında davamlı inkişaf təmin olunub, Azərbaycan iqtisadi artım tempinə görə dünyada lider dövlətlərdən birinə çevrilmiş, əhalinin sosial rifahı daha da yaxşılaşıb. Z.İsayevin sözlərinə görə, əhalinin gəlirlərinin yüksəlməsi insanların müxtəlif mallara və xidmətlərə olan tələbatını artırıb, nəticədə istehlakçılar öz hüquqlarının müdafiəsinə daha çox əhəmiyyət verməyə başlayıb.

Ölkədə istehsalın həcminin, malların və xidmətlərin növlərinin artdığını qeyd edən Zahid İsayev istehlak bazarında hələ də keyfiyyətsiz məhsulların satılması hallarına rast gəlindiyini bildirib, bu sahəyə diqqətin daha da artırıldığını vurğulayıb: «Cari ilin yanvar-avqust ayları ərzində Dövlət Xidməti tərəfindən həyata keçirilən nəzarət tədbirləri zamanı mənşəyi məlum olmayan, saxlama müddəti ötmüş, keyfiyyət və təhlükəsizlik göstəriciləri, həmçinin etiketlənməsi normativ sənədlərin tələblərinə cavab verməyən 954,9 ton müxtəlif növ ərzaq məhsulları satışdan çıxarılıb. Bu ərzaq məhsullarının 260,8 tonu məhv edilib, 30,3 tonu təkrar emala göndərilib, 529,7 tonu normativ sənədlərin tələblərinə uyğun etiketləndikdən sonra satışa qaytarılıb və 134,1 tonu ilə bağlı isə araşdırmalar davam etdirilir. Bu dövrdə qeyd edilən səbəblərdən 367,6 ton qeyri-ərzaq malları satışdan çıxarılıb, bu malların 58,5 tonu məhv edilib, 220,6 tonu müvafiq qaydada etiketləndikdən sonra satışa qaytarılıb, 88,5 tonu ilə bağlı araşdırmalar davam etdirilir».

Z.İsayev onu da bildirib ki, hesaat dövründə qanun pozuntusuna yol vermiş sahibkarlıq subyektləri barəsində Dövlət Xidməti tərəfindən Azərbaycan Respublikası İnzibati Xətalar Məcəlləsinə uyğun olaraq ümumilikdə 1 080 qərar qəbul olunub və inzibati xətaya yol vermiş şəxslər 1 608,4 min manat məbləğində cərimə edilib.

Konfransda Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin nümayəndələri «İstehlakçı hüquqlarının müdafiəsi ilə bağlı görülən işlər və qarşıda duran vəzifələr», «Qüsurlu mal satılarkən istehlakçının hüquqlarının təmin edilməsində sahibkarların vəzifələri», «İstehlakçı hüquqlarının pozulmasına görə məsuliyyət», «İstehlakçıların keyfiyyətli və təhlükəsiz mallarla təmin edilməsində sahibkarların vəzifələri» mövzularında məruzələrlə çıxış edib.