Sahibkarlıq

Ana səhifə

Sahibkarlıq

Astarada «Regionlarda sahibkarlığın inkişafına dövlət dəstəyi» mövzusunda tədbir keçirilib

24 sentyabr 2010 12:49 (UTC +04:00)

Bakı. Nicat Mustafayev - APA-Economics. Bu gün Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) sahibkarlığın inkişafına dövlət dəstəyinin həyata keçirilməsi, sahibkarların investisiya layihələrinin güzəştli şərtlərlə kreditləşdirilməsi və onların maarifləndirilməsi məqsədilə Astara rayonunda «Regionlarda sahibkarlığın inkişafına dövlət dəstəyi» mövzusunda tədbir keçirib.

Nazirlikdən «APA-Economics»ə verilən məlumata görə, tədbirdə Lənkəran iqtisadi rayonunda fəaliyyət göstərən 300-ə yaxın sahibkar iştirak edib.

İqtisadi İnkişaf Nazirliyinin Regionların inkişafı və dövlət proqramları şöbəsinin müdir müavini Fərrux Dadaşov və Sahibkarlığın inkişafı siyasəti şöbəsinin sahibkarlığın dəstəklənməsi və təşviqi sektorunun böyük məsləhətçisi Zaur Nuriyev çıxış edərək, Azərbaycan Respublikasının Prezidenti İlham Əliyevin uğurlu iqtisadi siyasəti nəticəsində regionların inkişafına böyük önəm verildiyini, sahibkarlığın daha da inkişaf etdiyini vurğulayıb, regionların inkişafında dövlət proqramlarının uğurlu icrasının əhəmiyyətini qeyd ediblər.

İqtisadi İnkişaf Nazirliyinin Bakı Biznes Tədris Mərkəzinin Regionlarla iş və əlaqələndirmə şöbəsinin müdiri Qorxmaz Əfəndiyev sahibkarlığın inkişafına dövlət dəstəyinin əsas komponentlərindən biri kimi maarifləndirmənin əhəmiyyətini vurğulayıb, sahibkarlara və sahibkarlıq fəaliyyətinə yeni başlamaq istəyənlərə zəruri nəzəri biliklərin, praktiki bacarıqların, beynəlxalq təcrübənin aşılanması, onlara tədris-metodiki, innovasiya və konsaltinq xidmətlərinin göstərilməsi sahəsində Bakı Biznes Tədris Mərkəzinin həyata keçirdiyi tədbirlər barədə məlumat verib.

Öz növbəsində SKMF-in icraçı direktoru Şirzad Abdullayev Fondun fəaliyyəti və güzəştli kreditlər hesabına regionlarda həyata keçirilən layihələr barədə məlumat verib və qeyd edib ki, bu günlərdə SKMF intensiv bağçılığın və tingçiliyin inkişafı üzrə investisiya layihələrinin maliyyələşdirilməsi məqsədilə sahibkarlıq subyektlərindən təkliflərin qəbulunu elan edib. Sahibkarlıq subyektlərindən müvəkkil kredit təşkilatları vasitəsilə təkliflərin qəbulu oktyabrın 21-də başa çatacaq. Astara rayonunda fəaliyyət göstərən sahibkarlara intensiv bağçılığın, xüsusilə subtropik və sitrus meyvə bağlarının salınması ilə əlaqədar investisiya təkliflərinin verilməsi prosesində aktiv iştirak etmələri tövsiyə olunub.

Tədbir çərçivəsində həmçinin sahibkarlar üçün treninq keçirilib. Treninqdə biznes ideyalarının formalaşdırılması, investisiya layihələrinin hazırlanması və təqdim edilməsi qaydaları barədə ətraflı məlumat verilib, güzəştli kreditlərin əldə olunması proseduru, sahibkarlıq subyektləri tərəfindən təqdim edilən investisiya layihələrinin tərtib edilməsinə dair minimal tələblər və müvəkkil kredit təşkilatları barədə məlumatları əks etdirən broşürlər, investisiya layihələrinin (biznes-planların) hazırlanmasına dair tövsiyə xarakterli materiallar təqdim edilib.

Tədbirin sonunda müvəkkil kredit təşkilatları vasitəsilə Astara və ətraf rayonlarda fəaliyyət göstərən 36 sahibkarlıq subyektinə 420 min manat güzəştli kredit verilib. Bu kreditlər hesabına 90 yeni iş yerinin yaradılması nəzərdə tutulur.