Sahibkarlıq

Ana səhifə

Sahibkarlıq

Bir qrup jurnalist Masazır Duz Zavodunda olub

30 sentyabr 2010 08:34 (UTC +04:00)

Bakı. Elnur Hüseynquluyev - APA-Economics. Bir qrup KİV nümayəndəsi «Bizim Duz» və «Azərduz» markalarının istehsal edildiyi Masazır Duz Zavodunda olub.

«Azersun» şirkətindən «APA-Economics»ə verilən məlumata görə, ziyarət zamanı müxbirlər zavodun fəaliyyəti, iş rejimi, istehsal sahələri və yodlaşdırılmış duzun ərsəyə gələnə qədər keçdiyi prosedurlarla yaxından tanış olublar.

Müəssisə ilə tanışlıq zamanı jurnalistlər istehsalat sahəsi, xammal əldə edilən sahələri və müasir texnologiyaların tətbiq edildiyi laboratoriyada da olublar. Duzun istehsalı prosesini mərhələ-mərhələ əyani şəkildə müşahidə edən KİV nümayəndələri burada ilk olaraq xammal sahəsi, sonra isə duzun işlənmə prosesi ilə tanış olublar. Zavod mütəxəssisləri tərəfindən geniş və ətraflı şəkildə məlumatlandırılan jurnalistlərin bütün sualları cavablandırılıb.

KİV nümayəndələri zavodun avtomatlaşdırılmış idarəetmə otağındakı prosesləri də izləyiblər. Onlar burada son texnologiya ilə təchiz olunmuş zavodun istehsal prosesindəki cihazların mərhələlərlə işlənməsi ilə tanış olublar.

Müasir avadanlıqlarla təchiz edilmiş laboratoriyada jurnalistlərə duzun yodlaşdırılması və hər bir duz kristalının ölçüsünə görə yodlaşdırılan duz nümunələri göstərilib. Yodsuz, natəmiz, keyfiyyətsiz və insan sağlamlığında təhlükəli fəsadlar yaradan duzun mənfi keyfiyyətləri ilə yanaşı, yüksək keyfiyyətli və beynəlxalq standartlara uyğun istehsal edilən yodlu duzun bir çox müsbət cəhətləri haqqında KİV nümayəndələrinə ətraflı məlumatlar verilib.

Xatırladaq ki, Masazır gölünün yanında inşa edilən Masazır Duz Zavodu bu ilin iyul ayının 21-də ölkə başçısı İlham Əliyevin iştirakı ilə açılıb. Müəssisənin açılışı Azərbaycan iqtisadiyyatında yeni bir mərhələnin başlanğıcını qoyub.

Müəssisə Azərbaycanda ilk dəfə sənaye üsulu ilə emal edilmiş, təmizlənmiş və yodlaşdırılmış duz istehsal edir. Dünya standartlarına uyğun yüksək səviyyəli texnologiya ilə çalışan Masazır Duz Zavodunda 130 nəfər işlə təmin edilib.

Duz zavodunun gündəlik emal gücü 100 tondur. Zavod tam gücü ilə işə düşdükdən sonra isə bu rəqəmin 300 ton olacağı nəzərdə tutulub. İldə 90 min ton ən yüksək standartlara uyğun yodlaşdırılmış duz istehsal edən zavod Azərbaycanı duz idxalçısından ixracatçısına çevirmək iqtidarındadır.

Masazır Duz Zavodunun əsas xammal mənbəyi Masazır duz gölüdür. Texnoloji sxemdə xam duzdan istifadə olunması da nəzərdə tutulub. Bu, yalnız qış aylarında göldəki duz konsentrasiyası aşağı olan zaman tətbiq olunacaq. Zavodun texnoloji sxemində Avropanın son model texnoloji avadanlıqlarından və avtomatik idarəetmə sistemindən istifadə edilir.