Sahibkarlıq

Ana səhifə

Sahibkarlıq

“Bakı Tikiş Evi” ASC-nin istehsal etdiyi məktəbli geyimləri sertifikatlaşdırılıb

06 oktyabr 2010 09:24 (UTC +04:00)

Bu barədə “APA-Economics”ə Azərbaycan Standartlaşdırma, Metrologiya və Patent üzrə Dövlət Komitəsinin mətbuat xidmətindən məlumat verilib.

Məlumatda bildirilir ki, Bakı şəhərində məktəbli geyimlərinin kütləvi istehsalı ilə məşğul olan “Bakı Tikiş Evi” ASC öz məhsullarını Milli Sertifikatlaşdırma Sistemində sertifikatlaşdırmaq məqsədilə Azərbaycan Standartlaşdırma, Metrologiya və Patent üzrə Dövlət Komitəsinə müraciət edib. Müraciət əsasında müəssisədə istehsal olunan məktəbli paltarlarından (oğlanlar üçün göy rəngli parçadan gödəkcə və şalvar, qızlar üçün göy rəngli parçadan pencək və damalı parçadan yubka) və məktəbli paltarları üçün astarlıq parçadan nümunə götürülərək komitənin Təcrübə-Sınaq Mərkəzinin (AzTEST) yüngül sənaye məhsullarının sınaq laboratoriyasına təqdim edilib.

Cari ilin 22-30 sentyabr tarixlərində həyata keçirilən sınaqlar nəticəsində nümunələrin yoxlanılmış göstəricilərinə görə QOST 25295-2003 standartının tələblərinə cavab verdiyi müəyyən olunub. Sınaq protokolları əsasında Standartlaşdırma, Metrologiya və Patent üzrə Dövlət Komitəsinin 1 saylı Ərazi Sınaq və Sertifikatlaşdırma İdarəsi “Bakı Tikiş Evi” ASC-nin istehsal etdiyi “məktəbli oğlanlar üçün kostyum (gödəkcə və şalvar)” və “məktəbli qızlar üçün kostyum (pencək və yubka)” məhsullarına uyğunluq sertifikatlarının verilməsi barədə qərar qəbul edib. Müəssisə 1 oktyabr 2010-cu il tarixindən uyğunluq sertifikatları ilə təmin edilib.

Bundan başqa, “Bakı Tikiş Evi” ASC tərəfindən “BTE” loqotipinin əmtəə nişanı kimi qeydiyyatı ilə bağlı Standartlaşdırma, Metrologiya və Patent üzrə Dövlət Komitəsinə iddia ərizəsi daxil olub. Hazırda qeydiyyatla bağlı məsələlər ekspertiza mərhələsindədir. Ekspertizanın rəyi yaxın günlərdə məlum olacaq.