Sahibkarlıq

Ana səhifə

Sahibkarlıq

ATİB “Yaşıl iqtisadiyyat” konsepsiyası ilə bağlı seminar keçirib

13 oktyabr 2010 12:53 (UTC +04:00)

Bakı. Elnur Hüseynquluyev - APA-Economics. Bu gün Azərbaycan Türkiyə İş Adamları Birliyində (ATİB) jurnalistlər üçün “Yaşıl iqtisadiyyat” konsepsiyasının mahiyyəti və komponentləri» mövzusunda seminar keçirilib.

«APA-Economics»in məlumatına görə, seminarda ATİB-in layihələr və tədqiqatlar şöbəsinin müdiri Kənan Aslanlı “yaşıl iqtisadiyyat”ın davamlı bir inkişafa və ekoloji iqtisadi biliklərə əsaslanan iqtisadi inkişaf modeli olduğunu bildirib.

K.Aslanlı deyib ki, hələ də dünya üzrə yaşıl iqtisadiyyat modeli tam olaraq qurulmayıb. Lakin bu sahədə artıq tədqiqatlara başlanılıb: “Statistikaya nəzər yetirsək, görərik ki, 2008-ci ildə beynəlxalq miqyasda “yaşıl iqtisadiyyat” üzrə mal və xidmətlər bazarının dövriyyəsi 1,370 trln. ABŞ dolları təşkil edib ki, bu da dünya iqtisadiyyatının 2,4%-i deməkdir. Dünyada “yaşıl iqtisadiyyat” bazarında 2,3 mln. insan çalışır. Avropa Birliyində isə hazırda maşınqayırma sənayesində birbaşa çalışan 2 mln. işçidən yaşıl texnologiyaya keçdikdən sonra cəmi 150 min işçiyə ehtiyac olacaq. Lakin dünyada tanınmış neft və qeyri-neft sahəsi ilə məşğul olan şirkətlər “yaşıl iqtisadiyyat”ın tətbiqinə o qədər də maraq göstərmir. BMT-nin hesablamalarına görə, inkişaf etməkdə olan ölkələrdə “yaşıl iqtisadiyyat”ın inkişafı hər il 40 mlrd. dollar investisiya tələb edir. Bu şirkətlərin illik aylıq xalis mənfəəti isə 50 mlrd. dollarla ölçülür».

K.Aslanlı Azərbaycanda “yaşıl iqtisadiyyat”ın inkişafına əsas maneələrin bu sahədə qanunvericilikdə boşluqların olması, texnologiyaların zəifliyi, statistika problemi, həmçinin institutsional əlaqələrin zəifliyi və enerji iqtisadiyyatı və ekoloji iqtisadiyyat üzrə kadr çatışmazlığı ilə izah edib: “Dövlətin artan subsidiyalaşdırma imkanları, əlverişli təbii şərait və coğrafi yerləşmə həmçinin məşğulluq səviyyəsinin stabilliyi Azərbaycanda “yaşıl iqtisadiyyat” və “yaşıl biznes”in inkişafı üçün imkanlar olduğunu göstərir”.

K.Aslanlı qeyd edib ki, 2010-cu ilin dövlət büdcəsindən ətraf mühitin mühafizəsinə 3,2 mln. manat həcmində vəsait ayrılıb ki, bunun da 2,5 mln. manatı bu sahədə çalışan insanların əmək haqqı xərcləridir: “Fikrimcə, 0,7 mln. manatlıq vəsait ətraf mühitin mühafizəsi üçün çox az məbləğdir. Burada ətraf mühitin mühafizəsi üçün yeni texnologiyaların tətbiqi və digər müasir ekoloji modellərin tətbiqi nəzərə alınmır”.