Sahibkarlıq

Sahibkarlıq

«Azersun» əhalidən kağız tullantılarını pulla alacaq

14 oktyabr 2010 14:00 (UTC +04:00)

Bakı. Əli Əhmədov – APA-Economics. «Azersun Holding» Şirkətlər Qrupu gələn il işə düşəcək Kağızın Təkrar Emalı Fabrikini xammalla təmin etmək məqsədilə əhalidən kağız tullantılarını pulla alınmasını təşkil etmək niyyətindədir.

Şirkətin rəhbəri Abdulbari Goozal «APA-Economics»ə bildirib ki, hazırda müəssisə üçün tullantı kağızların yığılması üçün sistem yaradılır. Bu məqsədlə respublikanın bütün rayon və şəhərlərində fabrikin nümaynədəlikləri açılacaq, onlar lazımi texnika və nəqliyyatla təmin olunacaq. Bunun üçün «Azersun» rəşbərliyi nümaynədəliklərə müvafiq yer ayrılması üçün rayonların icra hakimiyyətlərinə müraciət etmək niyyətindədir. Kağız tullantılarının yığılmasıyla məşğul olan məntəqələrin zibilliklərin yaxınlığında fəaliyyət göstərməsi nəzərdə tutulur. Şirkət kağız tullantılarını pulla almaq niyyətindədir. Kağızın keyfiyyətindən və vəziyyətindən asılı olaraq tullantının tonu 20-40 manata alınacaq.

Xatırladaq ki, «Karton-Tara» ASC-nin bazasında yaradılan Kağızın Təkrar Emalı Fabriki Sumqayıt şəhərinin sənaye zonasında 20 hektar ərazidə qurulacaq. Ümumi investisiya dəyəri 30 mln. avro olan bu müəssisənin gündəlik emal gücü 200 ton, illik 60 min ton təşkil edəcək. Fabrikdə 600-ə yaxın insanın işlə təmin olunması nəzərdə tutulub. Hazır məhsulun təxminən 30%-i ölkədaxili kağız tələbatını ödəyəcək, qalan 70%-i isə qonşu dövlətlərə - Gürcüstan, Rusiya (Dağıstan) və Türkmənistana ixrac olunacaq.